पोखरा, नेपाल बीमा प्राधिकरणले मुलुकमा संचालनमा रहेका आठवटा बीमा कम्पनीलाई कारवाही गरेको छ। बीमा ऐन २०७९ का प्रावधानहरुको पालना नगरेर ऐन नियम उल्लङ्घन गरेको भन्दै नेपाल बीमा प्राधिकरणले बिभिन्न आठवटा बीमा कम्पनीलाई कारवाही गर्ने निर्णय गरेको हो ।

कारबाहीमा पर्ने बीमा कम्पनीहरूमा नेपाल लाइफ इन्स्योरेन्स, एसियन लाइफ इन्स्योरेन्स, नेपाल पुनर्बीमा कम्पनी, हिमालयन रि इन्स्योरेन्स, नेको इन्स्योरेन्स, हिमालयन लाइफ, ओरियन्टल इन्स्योरेन्स र एलियन्ट इन्स्योरेन्स ब्रोकर कम्पनी रहेको बताइएको छ ।

यसैगरी नेपाल पुनर्बीमा कम्पनीका सीईओ सुरेन्द्र थापालाई संस्थागत सुधारका लागि सचेत गराउने वा निर्देशन दिने प्रकृतिको कारबाही गरिएको छ भने एलियन्ट इन्स्योरेन्स ब्रोकरलाई तीन महिनाका लागि निलम्बन गरिएको प्राधिकरणले जनाएको छ ।

त्यस्तै, बाँकी बीमा कम्पनीहरूलाई भने प्रचलित बीमा ऐनको व्यवस्थाअनुसार प्रति कम्पनि दुई लाख रुपैयाँका दरले जरिवाना गरिएको प्राधिकरणले जनाएको छ ।