पोखरा, जानकी माध्यमिक विद्यालय पोखरा १७ महतगौडाको परिसरमा उत्सवको चहलपहल थियो । साना नानीबाबुदेखि सेतो कपाल फुलेका अभिभावक सम्म एउटै आँगनमा जम्मा भएका थिए । उनीहरु सबैका आँखामा एउटा साझा भाव देखिन्थ्यो, विद्यालय प्रतिको गर्व र मायासंगै गुणस्तरीय शिक्षाका लागि शिक्षक, विद्यार्थी र अभिभावकको त्रिकोणात्मक प्रयासको खाँचो छ ।
विद्यालयको ४८ औं बार्षिकोत्सवको अवसरमा विद्यालयको आँगन ध्वजापतकाले रंगीन बनेको थियो । शिक्षकले हात समातेर अक्षर चिनाएका विद्यार्थीहरु मञ्चमा गीत, नृत्य र मन्तव्य प्रस्तुतगर्दै थिए उनीहरुको हाँसो र तालीको गुञ्जनले विद्यालयका संस्थापक, आमन्त्रित अतिथि सम्मलाई नयाँ जीवन दिएको अनुभूति भए जस्तो महसुस भएको थियो ।
विद्यालयका प्रमुख अक्षयकोष दाता एवम् पोखरा महानगरपालिका वडा नं. १७ का वडासदस्य शिवराम भण्डारीले कार्यक्रमको उद्घाटन गर्दै शिक्षा केवल पाठ्यपुस्तकमा मात्र सिमीत नभई जीवन बदल्ने शक्ति भएको उल्लेख गरे । उनले सामुदायिक विद्यालयसंग चौतर्फी विकासमा वडास्तरबाट सक्दो सहयोग गर्ने प्रतिवद्धता पनि व्यक्त गरे ।
कार्यक्रममा विद्यालयको विकासमा सहयोग गर्ने पोखरा १७ निवासी लिलकाजी गुरुङ, व्यवस्थापन समितिका निवर्तमान अध्यक्ष नगेन्द्र गुरुङ, विद्यालयका प्रधानाध्यापक अर्जुन कँडेल, लेखापाल अमित वानिया, ढुङ्केसाँघु सितापाईला आमा समुह, इक्रा पाउण्डेशन लगायतका विभिन्न संघसस्था तथा व्यक्तित्वहरुलाई दोसल्ला र सम्मानपत्रले सम्मान गरिएको थियो ।
उक्त अवसरमा स्थानीय जागरण आमा समुहले गत तिहारमा भैलो खेलेर संकलन गरेको ५१ हजार रुपैयाबाट बिधालयमा अक्षयकोष स्थापना गरेको थियो थियो । समुहले उक्त रकम बरावरको चेक विद्यालय व्यवस्थापन समितिकाअध्यक्ष हरिप्रसाद बास्तोलालाई हस्तान्तरण गरेको हो ।
उक्त कार्यक्रममा पार्दी मावि व्यवस्थापन समितिकाअध्यक्ष सुवर्ण श्रेष्ठले सामुदायिक विद्यालय सञ्चालनमा आर्थिक अभाव महत्वपूर्ण चुनौतीका रुपमा रहेको बताउनुभयो, गुणस्तरीय शिक्षाका लागि सम्वन्धित निकायले आवश्यक सहयोग गर्नुपर्न मा उनले जोड दिए ।
अक्षयकोषदाता एवम् सामाजिक व्यक्तित्व विरेन्द्रनारायण विजुकुच्छेले समाजका विपन्न र असहाय परिवारका विद्यार्थीको अध्ययनको थलो बनेको सामुदायिक विद्यालयले भौतिक संरचनालाई भन्दा गुणस्तरीय शिक्षामा जोड दिनुपर्ने आवश्यकता रहेको बताए ।
कार्यक्रममा विद्यालय व्यवस्थापन समितिकाअध्यक्ष हरिप्रसाद बास्तोलाले सामुदायिक विद्यालय केवल पठनपाठन गर्ने मात्र नभई समाजको भविष्य निर्माण गर्ने आधारशिला भएको बताउँदै शिक्षा सचेत, सक्षम र जिम्मेवार नागरिक उत्पादन गर्ने आधार भएको बताए ।
पोखरा महानगरपालिकाको आर्थिक सहयोगमा जानकी माध्यमिक विद्यालयको खेलमैदानमा रहेको पक्कि भवनमा यसै आर्थिक बर्षदेखि अटिजम कक्षा सञ्चालन गरिएको जानकारी दिंदै उनले गण्डकी प्रदेशमा सरकारी स्तरबाट खोलीएको सो पहिलो कक्षा भएको उल्लेख गर्दे अटिजम कक्षामा हाल ४० जना विद्यार्थी भर्ना भएको जानकारी दिए ।
कार्यक्रममा कक्षागत र अतिरिक्त कृयाकलापमा प्रथम, द्धितीय र तृतीय हुने छात्रछात्रालाई पुरस्कार तथा मेडल वितरण गरिएको थियो । सो अवसरमा अटिजमका विद्यार्थी तथा अभिभावकलाई समेत पुरस्कृत गरियो ।
विद्यार्थीद्धारा विविध सांस्कृतिक प्रस्तुत गर्नुका साथै प्रतिवेदन प्रस्तुत गरिएको सो कार्यक्रममा शिक्षकअभिभावक संघका अध्यक्ष विक्रमवावु भण्डारीले स्वागत र शिक्षक तुलसी गिरीले सञ्चालन गरेका थिए ।
