काठमाडौँ, नेपाली काँग्रेस भित्र बिशेष महाधिबेशनको माग गर्दै आएका महाधिबेशन प्रतिनिधिहरुले पार्टीको नियमित महाधिबेशन निर्धारित समयमा हुन् नसकेको भन्दै अब विशेष महाधिवेशनको विकल्प नरहेको बताएका छन् । आज शुक्रबार काठमाडौंमा पत्रकार सम्मेलन गर्दै उनीहरुले घोषित मितिमा १५औँ महाधिवेशन नहुने स्पष्ट भइसकेको कारण बिशेष महाधिबेशन गर्नुपर्ने बैधानिक बाध्यता रहेको जनाएका छन ।
१५औँ महाधिवेशनको कार्यतालिकाका कार्यक्रम स्थगित भइसकेकाले विशेष महाधिवेशनमा जानुको विकल्प नरहेको उनीहरूको भनाइ छ । “अब स्पष्ट छ, नेपाली कांग्रेससँग विशेष महाधिवेशनबाहेक अन्य कुनै विकल्प बाँकी रहेन । विशेष महाधिवेशन, महाधिवेशन प्रतिनिधिको विशेष वैधानिक अधिकार हो,” महाधिवेशन पक्षधरहरूको नामबाट जारी विज्ञप्तिमा भनिएको छ “ यो कसैको छनोटको विषय होइन ।
नेपाली कांग्रेसजस्तो लोकतान्त्रिक पार्टीले आफ्नो विधानको वाध्यकारी व्यबस्था नमान्ने हो भने संविधान, विधिको शासनको वकालत गर्दै नागरिकमा जाने नैतिक धरातल कसरी रहन्छ ?” बिज्ञप्तीमा प्रश्न गरिएको छ। उनीहरूले पार्टी विधानभन्दा माथि कोही पनि हुन नसक्ने बताएका छन् । विधानको बाध्यकारी व्यवस्थाको पालना गर्नु पार्टी नेतृत्वको न्यूनतम जिम्मेवारी रहेको उनको भनाइ छ । पुस २७–२८ मा विधानको धारा १७(२) बमोजिम केन्द्रले विशेष महाधिवेशन गर्न उनीहरूले माग गरेका छन् ।
पत्रकार सम्मेलनमा नेता सुवास पोखरेलले भने-‘ कांग्रेससँग विशेष महाधिवेशनबाहेक अन्य विकल्प रहेन । यो हाम्रो वैधानिक अधिकार हो । विधानको बाध्यकारी व्यवस्था हो । पोखरेलले केन्द्रीय कार्यसमितिले नै विशेष महाधिवेशन आह्वान गरोस् भन्ने माग आफूहरूको रहेको बताए । पोखरेलले एकता र विश्वास एकैपटक जगाउन आग्रह पनि आफूहरूको आग्रह गरे ।
“हामी स्पष्ट गर्न चाहान्छौं, यो माग कसैको जित र हारको रूपमा नलिई पार्टीको एकता कायम राख्न तथा पार्टीको आन्तरिक लोकतन्त्र जोगाउँदै जनताप्रति जवाफदेही बन्ने अवसरको रूपमा ग्रहण गर्नुपर्छ,” उनीहरुले जारी गरेको बिज्ञप्तीमा भनिएको छ।
