पोखरा, नेपाल परिवार नियोजन संघ कास्कीले विहीबारदेखि आंफ्नो कार्यालयमा बिरामीहरुको लागि भिडियो एक्सरे (युएसजी) सेवा संचालनमा ल्याएको छ । गण्डकी प्रदेश सरकारको सहयोगमा उक्त सेवा संचालनमा ल्याइएको संघका वरिष्ठ शाखा प्रवन्धक नबराज तिवारीले  गुरुकुल खबरलाई जानकारी दिए ।

गण्डकी मेडिकल कलेजका रेडियोलोजी विभागका प्रमुख सह.प्रा.डा.केशव शर्माले बिरामीहरुको सेवाको लागि उक्त सेवा प्रदान गर्ने बुझिएको छ ।

संघले हाल परिवार नियोजन, सुरक्षित गर्भपतन, सुरक्षित मातृत्व, यौनजन्य रोगको परामर्श तथा उपचार, एच.आई.भि.परिक्षण तथा परामर्श, पाठेघरको मुखको क्यान्सर सम्बन्धि प्रारम्भिक परिक्षण तथा परामर्श, यौनिक तथा लैड्गिकतामा आधारित हिंसामा परेकालाई परामर्श तथा उपचारका साथै यौंन तथा प्रजनन् स्वास्थ्यसंग सम्वन्धित विभिन्न सेवाहरु प्रदान गर्दै आएको छ ।

नेपाल परिवार नियोजन संघ कास्कीका सभापति नवीन सिग्देलले बिहिबार आयोजित एक समारोहमा सेवाको शुभारम्भ गर्दै सेवाग्राहिको हितलाई मध्यनजर गर्दै सेवा संचालनमा ल्याइएको बताए ।