काठमाडौँ,  पूर्वप्रधानन्यायाधीश सुशीला कार्की नेपालको पहिलो महिला प्रधानमन्त्री बन्ने भएकी छन। उनलाई अब बन्ने अन्तरिम सरकारको प्रमुख नियुक्त गर्ने विषयमा सहमति जुटेसंगै उनि नेपालको पहिलो महिला प्रधानमन्त्री बन्ने भएकी हुन । नयाँ सरकार गठन गर्ने विषयमा सहमति जुटेसँगै राष्ट्रपति रामचन्द्र पौडेलले कार्कीलाई आज बेलुका ९ बजे सो पदमा सपथ गराउने भएको बुझिएको छ ।

यसअघि, नयाँ सरकार गठनका लागि छलफल गर्न पूर्वप्रधानन्यायाधीश सुशीला कार्की सहितको टोली शीतलनिवास पुगेको थियो । कार्की सहित जेनजी अभियन्ता तथा हामी नेपाल संस्थाका अध्यक्ष सुदन गुरुङ र अधिवक्ता ओमप्रकाश अर्याल पनि छलफलका लागि राष्ट्रपति निवास पुगेका थिए ।

कार्कीलाई अन्तरिम सरकारको प्रमुखमा चयन गर्ने विषयमा सहमति जुटे पनि संसद् विघटनका विषयमा सहमति जुट्न सकेको थिए । दुवै पक्ष आआफ्नो अडान यथावत् रहेका थिए । तर, अन्त्यमा संसद विघटन गर्ने विषयमा सहमति जुटेको हो ।

यसअघि भदौ २३ र २३ गतेको जेनजी आन्दोलनको दबाबपछि प्रधानमन्त्री केपी शर्मा ओलीले मंगलबार राजीनामा दिएका थिए । असामान्य परिस्थितिलाई ध्यानमा राख्दै दिइएको राजीनामा राष्ट्रपति पौडेलले सोही दिन स्वीकृत गरेका थिए।