पोखरा, ब्रह्माकुमारी ईश्वरीय विश्व विद्यालयले चारदिनको अबधिमा ११ हजार ९ सय १६ पिन्ट रगत संकलन गरेको छ । यही भदौ ६ गतेदेखि संस्थाको समाजसेवा प्रभागको आयोजनामा नेपालको विभिन्न भागका शाखा र क्षेत्रीय कार्यालयमा गरिएको रक्तदान कार्यक्रम अन्तर्गत मंगलवार सम्ममा उक्त परिमाणमा रगत संकलन गरिएको जानकारी ब्रह्माकुमारी ईश्वरीय विश्व विद्यालय नेपालका महासचिव राजयोगी ब्रह्माकुमार शैलेषराज बरालले गुरुकुल खबरलाई दिएका छन ।

सो संस्थाको पूर्वमुख्य प्रशासिका राजयोगिनी दादी प्रकाशमणिको १८ औँ पुण्य तिथि तथा विश्वबन्धुत्व दिवसको सन्दर्भ पारेर संस्थाले रक्तदान कार्यक्रम आयोजना गरेको हो । केन्द्रले नेपाल र भारतमा गरी एक सय घण्टामा एक लाख पिन्ट रगत संकलन गर्ने लक्ष्य राखेको जनाएको छ। नेपालको काठमाडौँ, विराटनगर, नारायणगढ, राजविराज, वीरगञ्ज, पोखरा, दाङ, बुटवल, हेटौँडा, जनकपुर, भैरहवा, धनगढी, पाल्पा, बाग्लुङ र नेपालगञ्जमा रहेका शाखा र केन्द्रहरुमा रक्तदान कार्यक्रमको आयोजना गरि रगत संकलन गरिएको हो ।

भदौ ६ गते एकैदिनमा पाँच हजार ४७ पिन्ट रगत संकलन भएको थियो । सो परिमाणमा रगत संकलन हुनु नेपालको सन्दर्भमा हालसम्मकै उच्च रहेको विज्ञप्तिमा जनाइएको छ । मानसिक शान्तिको लागि योगअभ्यास र अन्य क्रियाकलाप गराउने विश्वविद्यालयले मानव जीवन बचाउनका लागि रक्तदान मार्फत योगदान गरेको उल्लेख गरेको छ ।