पोखरा, पोखरा महानगरपालिका वडा नम्वर ५, प्रस्यांग रहेको जनहित महिला समूहको आयोजनामा तथा धारापानी महिला बहुउद्देश्यीय सहकारीको सहआयोजनामा प्रथम जनहित खुला तीजगीत प्रतियोगिता सम्पन्न भएको छ । प्रतियोगितामा १६ समूहले भाग लिएकोमा पोख्रेली दिदीबहिनी समूहले पहिलो स्थान प्राप्त गर्दै नगद १० हजार रूपैया प्राप्त गरेको थियो।

यसैगरि धारापानी आमा समूहले दोस्रो स्थान प्राप्त गरी ७ हजार रूपैँया र शिवालय महिला समूह तेस्रो तथा धर्मस्थली आभारभूत विद्यालयले सान्त्वना स्थान प्राप्त गरी क्रमश ५ हजार र ३ हजार प्राप्त गर्न सफल भए। त्यसैगरी, उत्कृष्ट भेषभूषातर्फ गतिशील महिला आमा समूह र उत्कृष्ट नृत्यतर्फ नमुना आदर्श आमा समूह विजयी भएका छन् ।

प्रतियोगिताको उद्घाटनमा बोल्दै पोखरा,महानगरपालिका- ५ का वडाध्यक्ष विष्णुप्रसाद बरालले यस्ता कार्यक्रमले कला संस्कृतिकाे संरक्षण गर्ने र नयाँ पुस्तामा हस्तान्त्रण गर्न महत्वपूर्ण भूमिका खेल्ने बताए । पछिल्लो समय भड्किलो तिज देखिन लागेको भन्दै परम्परागत मौलिकता र चेतनामूलक गीतमार्फत समाजलाई सन्देश दिनू पर्नेमा जोड दिए । कार्यक्रममा वडा सदस्य एवम् महानगर कार्यपालिका सदस्य हरिमाया विश्वकर्मा, वडा सदस्य गोविन्द पराजुली, सावित्री कोईराला, हेमराज भण्डारीलगायतले शुभकामना दिएका थिए ।

राष्ट्रिय सङ्गीतकर्मी सङ्घका अध्यक्ष रामचन्द्र ढकाल , उपाध्यक्ष राम पौडेल र लोकगायिका/सञ्चारकर्मी सिता बरालले निर्णयको भूमिका निभायका थिए। जनहित महिला समूहका अध्यक्ष चन्द्रावती गैरे अधिकारीको अध्यक्षता तथा सचिव कमला लामिछानेको सञ्चालनमा कार्यक्रम सम्पन्न भएको हो ।