पोखरा, पोखरामा जारी राष्ट्रिय औधोगिक ब्यापार मेला अन्तर्गत सूचना प्रविधि अध्ययन गर्ने विद्यार्थीहरुको संस्था सिएस आइटीएनको समन्वयमा भएको स्टार्टअप परियोजना प्रतियोगितामा गण्डकी बोर्डिङका विद्यार्थीहरु बिजयी भएका  छन् । उनीहरुले नगद रु. ६० हजार पुरस्कार पाए ।

मेलाको प्रचार समितिका संयोजक मनोहरी पौडेलका अनुसार गण्डकी बोर्डिङ स्कूलमा कक्षा ११ का अर्जित पौडेल र १२ पढ्ने सुविन चापागाईंले बनाएको हरियाली एप खोलेर जोसुकैले पनि आफूले कति कार्बन उत्सर्जन गरेको छु भन्ने जानकारी लिन सक्छन् । त्यस्तै यो एपबाट जमिनको तस्वीर लिँदा त्यहाँ कतिवटा रुख रोप्न सकिन्छ वा कसरी उपयोग गर्न सकिन्छ भन्ने जानकारी प्राप्त हुन्छ ।

दोस्रो चाहिँ कृषकहरुको निम्ति बनाइएको ‘आहार’ नामक बाली निगरानी प्रणाली बन्यो । यो एपले वातावरणीय अवस्थाको जानकारी सहित चिस्यान र बोटविरुवाको अवस्थाबारे जानकारी दिन्छ । यो एप सन्जिव शाह,मनिष पौडेल र अमन शेखले बनाएका हुन् । उनीहरुले ४० हजार नगद पुरस्कार पाए ।

तेस्रो चाहिँ अभिषेक लौडारी, वर्षा केसी,गृष्मा रिजाजको समूह बन्यो । उनीहरुले २० हजार पुरस्कार पाए । उनीहरुले दृष्टिविहीनले प्रयोग गर्न मिल्ने छडी बनाएका छन् । सेन्सर सहितको सो छडीले दृष्टिविहीनलाई मद्दत गर्छ ।

पोखरा उद्योग वाणिज्य संघका महासचिव शोभा गौतमका अनुसार विजेतालाई संघका अध्यक्ष गोकर्ण कार्की सहित पदाधिकारी र कार्यसमितिका सदस्यहरुले पुरस्कार र प्रमाणपत्र वितरण गरेका थिए । प्रतियोगितामा ४५ समूहको सहभागिता रहेको सिएसआइटीएनका अध्यक्ष विष्णु पौडेलले जानकारी दिए ।

पोखरा उद्योग वाणिज्य संघको आयोजनामा माघ १० देखि उक्त मेला संचालन भैरहेको छ । पोखराको नयाँबजारमा मेला चलिरहेको छ।