काठमाडौं, सैब जैबको उत्कृष्ट ब्याटिङप्रेरित सुदूरपश्चिम रोयल्सले नेपाल प्रिमियर लिग (एनपीएल)मा लगातार तेस्रो जित निकालेको छ । सुदूरपश्चिमले शनिबार लुम्बिनी लायन्सविरुद्ध ४५ रनको जित निकालेको हो । प्रतियोगितामा सुदूर पश्चिमले यसअघि विराटनगर किंग्सविरुद्ध ९० र काठमाडौं गुर्खाजविरुद्ध ७३ रनको जित निकालेको थियो ।
कीर्तिपुरस्थित त्रिवि क्रिकेट मैदानमा सम्पन्न खेलमा सुदूरपश्चिमले दिएको १८८ रनको लक्ष्य पछ्याउने क्रममा लुम्बिनीले निर्धारित २० ओभरमा नौ विकेट गुमाएर १४२ रनमात्र बनाउन सक्यो ।
सुदूरपश्चिमविरुद्ध विवेक यादवबाहेक अन्य ब्याटरको प्रदर्शन उल्लेख्य बन्न सकेन । विवेकले अविजित ७७ रन बनाए । उनले ५४ बलमा तीन चौका र सात छक्का प्रहार गरे । विवेक प्रतियोगितामा अर्धशतक बनाउने १२औँ ब्याटर बने ।
१९–५ को स्थितिबाट विवेकले सन्दीप जोरासँग छ्रैटौँ विकेटका निम्ति ३७ रनको साझेदारी गर्दै लुम्बिनीको इनिङ सम्हाल्ने प्रयास गरेका थिए ।
लुम्बिनीले ११औँ ओभरको दोस्रो ओभरमा सन्दीपलाई गुमायो । सन्दीपले २६ बलमा एक छक्कासहित २० रन थपे । दीनेश अधिकारीले १६ बलमा दुई चौकासहित १४ रन जोडे । सूर्य तामाङले लुम्बिनीको खातामा सात रन जोडे ।
सुदूरपश्चिमविरुद्ध लुम्बिनीका तीन ब्याटर ‘गोल्डेन डक’ भए । लुम्बिनीका ओपनर अर्जुन साउद, साद बिन जफर र रेमोन सिमोन्ड्स पहिलो बलमै पभेलियन फर्किएका थिए ।
त्यसअघि लुम्बिनीले ६ ओभरको खेल सकिँदासम्म ३६ रन बनाउँदा शीर्ष क्रममा पाँच ब्याटरलाई गुमाइसकेको थियो । लुम्बिनीका ओपनर अर्जुन साउद ‘गोल्डेन डक’ भए । अर्का ओपनर उन्मुक्त चन्द पनि चार रनमै पभेलियन फर्किए । यसअघि पोखरा एभेन्जर्सविरुद्ध ९५ रन बनाएका कप्तान रोहितकुमार पौडेलले पनि आज पाँच रनमात्रै थप्न सके । टम मुरेसले सात रन जोडे । साद बिन जफर पनि ‘गोल्डेन डक’ भए ।
लुम्बिनीविरुद्ध ब्रान्डन म्याकमुलम र सैब जैबले समान तीन विकेट लिए । चार ओभर बलिङ गरेको म्याकमुलमले २१ रन खर्चिए । जैबले चार ओभरमा ३३ रन दिए । स्टक कुग्गेलेनले दुई विकेट लिए । अभिनाश बोहराको नाममा एक विकेट रह्यो ।
पहिलो इनिङः शतकबाट १० रनले चुके जैक
त्यअसघि सैब जैबको उत्कृष्ट ब्याटिङ प्रदर्शनमा टस हारेर ब्याटिङमा आएको सुदूरपश्चिमले निर्धारित २० ओभरमा चार विकेट गुमाएर १८७ रनको योगफल खडा गरेको थियो ।
सुदूरपश्चिमबाट शतक बनाउन १० रनले चुकेका सैब जैबले ९० रन बनाए । उनले ६१ बलमा ६ चौका र पाँच छक्का प्रहार गरे । जैबलाई १७.४ ओभरमा रेमोन सिमोन्ड्सले उन्मुक्त चन्दबाट क्याच गराए ।
जैबले अर्का ओपनर विनोद भण्डारीसँग ४९ रनको साझेदारी गर्दै सुदूरपश्चिमलाई बलियो सुरुआत दिलाएका थिए । यस्तै, उनले दोस्रो विकेटका निम्ति ब्रान्डन म्याकमुलमसँग ५६ रनको साझेदारी गरेका थिए ।
विनोदले सुदूरपश्चिमको खातामा १७ रन थपे । रोहितकुमार पौडेलले गरेको सातौँ ओभरको तेस्रो बलमा सन्दीप जोराबाट क्याच हुनुअघि उनले १३ बलमा दुई चौका प्रहार गरे ।
ब्रान्डन म्याकमुलमले २० बलमा एक छक्का र एक चौकासहित २३ रन बनाए । म्याकमुलमलाई १३.४ ओभरमा विवेक यादवले साद बिन जफरबाट क्याच गराएका थिए ।
कप्तान दीपेन्द्रसिंह ऐरी ३९ रनमा अविजित रहे । उनले १९ बलमा चार चौका र दुई छक्का प्रहार गरे । दीपेन्द्रसँगै अविजित रहेका स्कट कुग्गेलिनले ११ रन थपे ।
सुदूरपश्चिमबाट पाँचौ नम्बरमा ब्याटिङका निम्ति आएका आरिफ सेख ‘गोल्डेन डक’ भए ।
लुम्बिनीका रेमोन सिमोन्ड्सले दुई विकेट लिए । चार ओभर बलिङ गरेका सिमोन्ड्सले ३२ रन खर्चिए । विवेक यादव र कप्तान रोहितकुमार पौडेलको नाममा समान एक विकेट रह्यो ।
प्रतियोगितामा दुवै लुम्बिनीको भने लगातार तेस्रो हार हो । एनपीएलमा दुई खेल खेलेको लुम्बिनीले दुवै खेलमा हार व्यहोरेको छ । लुम्बिनी आफ्नो पहिलो खेलमा विराटनगर किंग्ससँग दुई विकेटले पराजित भएको थियो । दोस्रो खेलमा पोखरा एभेन्जर्ससँग पराजित भएको थियो ।
लगातार तेस्रो जित निकालेको सुदूरपश्चिम तालिकाको शीर्ष स्थानमा उक्लिएको छ । सुदूरको खातामा ६ अंक छ । समान खेल खेल्दा पनि जितविहीन लुम्बिनी भने तालिकाको पुछारमा छ ।
