पोखरा । पोखरामा लामो समयदेखि फोटो पत्रकारीतामा क्रियाशिल पत्रकार राम गुरुङलाई ‘रामलाल श्रीमाया राष्ट्रिय फोटोग्राफी’ पुरस्कारबाट सम्मान गरिएको छ ।

विश्व फोटोग्राफी दिवस तथा पोखरा फोटोग्राफर संघको ४२ औं साधारण सभाको अवसर पारेर गुरुङलाई उक्त सम्मान प्रदान गरिएको हो ।

पुरस्कारको राशी नगद २५ हजार ५ सय ५५ रुपैयाँ सहित दोसल्ला र सम्मानपत्र रहेको छ ।

सम्मानित हुँदै गुरुङले फोटोपत्रकार हुनु अघि आफु फोटोग्राफर भएको स्मरण गर्दै फोटोग्राफर संघ आफ्ना लागि आस्था र विस्वासको संस्था रहेको बताए । उनले भने ‘पुरस्कारले पेशाप्रतिको जिम्मेवारी थपिएको अझ थपिएको छ ।’

यसैबीच सोही कार्यक्रममा फोटोग्राफर संघमा आबद्ध सदस्यहरुको १२ पास गरेका छोराछोरीलाई सम्मान गरिएको थियो ।

कार्यक्रममा बोल्दै नेपाल उद्योग वाणिज्य संघका पुर्व अध्यक्ष आनन्दराज मुल्मीले फोटोग्राफी विधाको आवश्यकता बारे प्रकाश पार्दै समय परिवर्तनसगै फोटोग्राफी विधा अन्य विधाको तुलनामा तिब्र गतिमा परिवर्तन भइरहेको बताए । विश्वमा अनौठा प्रविधिहरु आएको सुनाउँदै उनले अहिले आर्टिफिसियल प्रविधिमा प्रवेश गरिसकेको धारणा राखे । उनले भने ‘हिजो जस्तो स्टुडियोमा फोटो खिचेर जीवनयापन गर्ने स्थिति छैन, फोटोग्राफी व्यवसायमा लाग्नेहरु समयअनुसार परिवर्तन हुनुपर्छ।’

कार्यक्रममा पोखरा ४ का वडा अध्यक्ष देवकृष्ण पराजुली, महिला उपसमिति संयोजक रीता पौडेललगायतले आफ्नो धारणा राखेका थिए ।