काठमाडौं, नेपाली कांग्रेसका नेता नैनसिंह महरले सुदूरपश्चिमका जनताको दशकौँदेखिको सपना गेटा मेडिकल विश्वविद्यालय र स्तरिय अस्पतालको स्थापना भएकाले यसको कार्यान्वयनमा अब कुनै प्रकारको ढिलाइ हुन नहुने बताएका छन्। गेटा मेडिकल विश्वविद्यालयमार्फत एमबीबीएस अध्ययन तत्काल सञ्चालन गरिनुका साथै कम्तीमा तिन सय बेडको आधुनिक अस्पताल पूर्ण क्षमतामा सञ्चालन गर्नु अहिलेको प्रमुख आवश्यकता भएको उल्लेख गरे।
गेटा केवल एउटा अस्पतालको विषय होइन, यो सुदूरपश्चिमका लाखौँ नागरिकको स्वास्थ्य, चिकित्सा शिक्षा र समग्र विकाससँग जोडिएको राष्ट्रिय गौरवको परियोजना हो। यसलाई कुनै बहाना बनाएर अल्झाउने वा जनताको सपनामाथि तुसारापात गर्ने काम कसैले गर्नु हुँदैन,महरले भने।
उनले सुदूरपश्चिमका विद्यार्थीलाई आफ्नै प्रदेशमा गुणस्तरीय चिकित्सा शिक्षा अध्ययन गर्ने अवसर उपलब्ध गराउनुका साथै स्थानीय नागरिकलाई सहज, सुलभ र विशेषज्ञ स्वास्थ्य सेवा प्रदान गर्न गेटा मेडिकल विश्वविद्यालय र अस्पतालको प्रभावकारी सञ्चालन अपरिहार्य रहेकोमा जोड दिए ।
महरले सरकार, सम्बन्धित मन्त्रालय, विश्वविद्यालय तथा सबै सरोकारवाला निकायलाई आवश्यक कानुनी, प्रशासनिक र बजेटको व्यवस्था मिलाई गेटा मेडिकल विश्वविद्यालयबाट एमबीबीएस कार्यक्रम र तिन सय भन्दा बढी शैयाको अस्पताल सेवा तत्काल सञ्चालनमा ल्याउन आग्रह गरे।
सुदूरपश्चिमका जनताको लामो संघर्ष र अपेक्षासँग जोडिएको स्वास्थ्य र शिक्षा जस्तो अहंम बिषयलाई अन्योलमा राख्ने छुट कसैलाई छैन। सरकारले जनभावनाको सम्मान गर्दै शीघ्र निर्णय गरी जनताको सपना साकार पार्नुपर्छ,महरले जोड दिए।
