पोखरा, पोखराको मुख्य बजार महेन्द्रपुल क्षेत्रको ट्राफिक समस्या समाधानका निम्ति ‘सुझाव संकलन एवं कार्यान्वयन समिति’ गठन हुने भएको छ । पोखरा उद्योग वाणिज्य संघले मंगबार जिल्ला ट्राफिक प्रहरी कार्यालय कास्कीको समन्वयमा आयोजना गरेको छलफल कार्यक्रममा समस्याको पहिचान र त्यसको समाधानका निम्ति समिति गठन गर्ने निर्णय भएको हो ।
महेन्द्रपुल क्षेत्रका व्यवसायी सहभागी छलफल कार्यक्रमका प्रमुख अतिथि जिल्ला ट्राफिक प्रहरी कार्यालयका प्रमुख प्रहरी निरीक्षक सुजित कुमार देवकोटाले नागरिकको जीवन रक्षा र सहज पार्किङ आफ्नो सरोकार भएकोले यो विषयमा सहकार्यको प्रस्ताव गरेसँगै समिति गठनको सहमति जुटेको हो ।
यसअघि पोखरा उद्योग वाणिज्य संघका अध्यक्ष गोकर्ण कार्कीले फुटपाथ पैदलयात्रीकै भएको भन्ने बिषयमा पोखरा उद्योग वाणिज्य संघ स्पष्ट भएको बताउँदै सडकमा गरिने पार्किङका सवारी आवागमन र ट्राफिक व्यवस्थापन बिग्रन नहुनेमा जोड दिएका थिए ।
पोखरा उद्योग वाणिज्य संघको अगुवाइमा फुटपाथमा हुने अनधिकृत व्यवसाय हटाइएको, पार्किङमा देखिएका समस्या समाधानको पहल भएको स्मरण गर्दै उनले भने,‘हामी व्यवसायीलाई मर्का नपरोस् भन्ने चाहन्छौँ। मान्छे आएपछि पार्किङ चाहिन्छ र त्यसको व्यवस्थापन कसरी गर्ने भन्ने मुल प्रश्न हो । यसमा स्थानीयको साथ र सहयोग हुनुपर्छ ।’
कार्यक्रममा बोल्दै पोखरा ९ का वडाध्यक्ष महानगरले अस्तव्यस्त पार्किङलाई व्यवस्थित गर्न खोज्दा व्यवसायीबाट सहयोग नभएको भन्दै ट्राफिक व्यवस्थापनको लागि महानगर र प्रहरीलाई सघाउनुपर्ने नभए स्थानीयले नै व्यवस्थापन गर्नुपर्ने बताए।
पोखरा उद्योग वाणिज्य संघका उद्योग उपाध्यक्ष दिनेशचन्द्र बास्तोला र महासचिव शोभा गौतमले पनि ब्यवसायीलाई मर्का नपर्ने र ब्यापार व्यवसायमा असर नपर्ने गरि पार्किंगको ब्यबस्था मिलाइनुपर्नेमा जोड दिएका थिए ।
कार्यक्रममा स्थानीय व्यवसायी रोशन महर्जनले व्यवसाय पनि चल्ने र अरुलाई पनि बाधा नहुने गरी पार्किङको व्यवस्थापन हुनुपर्ने धारणा राखेका थिए । महेन्द्रपुलका स्थानीयवासी सुमन श्रेष्ठले महेन्द्रपुल क्षेत्रमा हुने दिनहुँ दुर्घटना हुने गरेको र त्यहाँ रहेको हाइमास्ट बत्ति नबल्दा दोषीको पहिचान गर्न पनि गाह्रो भएको सुनाएका थिए ।
कार्यक्रममा बोल्ने व्यवसायीहरुले भाडाका ट्याक्सीहरुले मुख्य बजार क्षेत्रको सडक नै कब्जा गरी पार्किङ गर्ने गरेको, फुटपाथको चौडाइ कति भन्ने प्रष्ट नभएको लगायतका गुनासा राखेका थिए । ती गुनासो सुनेका जिल्ला ट्राफिक कार्यालय कास्कीका प्रमुख देवकोटाले महेन्द्रपुल र मुख्य बजार क्षेत्रमा व्यवसाय गर्नेहरुले आफ्नो गाडी र कर्मचारीका मोटरसाइकल दिनभर दुकान अगाडि राख्दा पनि समस्या भएको सुनाएका थिए ।
पोखरा नगर क्षेत्रमा सिसि क्यामेरा नहुँदा ‘हिट एण्ड रन’ केसका अपराधी समात्न कठिन भएको पनि उनको भनाइ थियो । सिंगो कास्कीका लागि जम्मा ९२ जना ट्राफिक प्रहरी भएको बताउँदै उनले जनशक्ति अभावले सवै क्षेत्रमा ध्यान दिन नसकेको पनि स्वीकार गरे । उनले मादक पदार्थ सेवन गरी सवारी नचाउन पनि सबैसंग आग्रह गरे ।
