पोखरा, जाउँ है पोखरा अभियानको क्रममा पोखराका होटल तथा पर्यटन ब्यबसायीहरुसंगै पाल्पा पुगेका होटल संघ पोखरा नेपालका कार्यालय प्रमुख रामप्रसाद खनालको अकल्पनीय निधन भएको छ । जाउँ है पोखरा अभियानको क्रममा पाल्पा पुगेको बेला आइतबार मश्तिश्काघात भएका खनालको उपचारको क्रममा निधन भएको हो ।

आइतबार मश्तिष्कघात भएपछि उपचारको लागि उनलाई पाल्पाबाट भैरहवा स्थित युनिभर्सल कलेज अफ मेडिकल साइन्समा भर्ना गरिएकोमा उपचारकै क्रममा दुई दिनपछि बुधबार उनको निधन भएको हो।

गोर्खा आरुघाटका ४१ वर्षीय खनालका श्रीमती र एक छोरी छन् । यसैबीच होटल संघ नेपाल गण्डकी र होटल संघ पोखराले छुट्टा छुट्टै शोक बिज्ञप्ती जारी गरि खनालको निधनले परिवार मात्र होइन, पोखराको पर्यटन तथा होटल क्षेत्रले एक इमानदार, मिलनसार र कर्मशील सहयात्री गुमाएको जनाएको उल्लेख गरेका छन ।

‘खनाललाई कर्तव्यनिष्ठ, मेहनती र सबैसँग आत्मीय सम्बन्ध कायम गर्न सक्ने व्यक्तित्वका रूपमा हामीले बुझेका थियौं । यस दुःखद घडिमा दिवङ्गत आत्माको चिर शान्तिको कामना गर्दै शोक सन्तप्त परिवारजनमा गहिरो समवेदना प्रकट गर्न चाहन्छौं ।’ संघको गण्डकी प्रदेश समितिका अध्यक्ष हरिप्रसाद शर्मा गैह्रे र संघको पोखरा समितिका अध्यक्ष लक्ष्मण सुबेदीले छुट्टाछुट्टै जारी गरेका शोक बिज्ञप्तीमा जनाइएको छ।