पोखरा, पोखरा महानगरपालिका अन्तर्गत पर्ने लेखनाथ खानेपानी उपभोक्ता संस्थाको अध्यक्षमा मुरारी शर्मा निर्वाचित भएका छन् । संस्थाको छैटौं अधिवेशन अन्तर्गत शनिबार भएको निर्वाचनमा उनले ४० मत प्राप्त गरे । शर्माका निकटतम प्रतिस्पर्धी पुष्पकमल ढुंगानाले ३८ मत ल्याएका छन् । अर्की प्रतिस्पर्धी नारायणी भट्टराई रक्षाले ३७ मत प्राप्त गरेको निर्वाचन समितिले जनाएको छ ।

निर्वाचनमा जम्मा १२२ मत खसेको थियो । तीमध्ये ८ मत बदर भएको निर्वाचन समितिले बताएको छ । अधिवेशनमा नेतृत्व चयनका लागि अन्तिम समयसम्म सहमतिको प्रयास गरिएको थियो । सहमति जुट्न नसकेपछि चुनावी प्रक्रियाबाट अध्यक्ष छानिएको हो । निर्वाचित शर्मा संस्थाका बहालवाला अध्यक्ष हुन् । प्रतिस्पर्धामा उत्रिएका ढुंगाना उपाध्यक्ष र रक्षा सचिव हुन् ।

अध्यक्ष बाहेकका अन्य पदहरुमा भने कार्यसमिति सर्वसम्मत चयन भएको छ । खुला सदस्यहरुमा डम्मरबहादुर थापा, मेघराज भण्डारी र भरत न्यौपाने छानिएका छन् । त्यसैगरी मुकुन्द घिमिरे, सूर्यनाथ भण्डारी र टिकाराम भुर्तेल पनि सदस्यमा चयन भए । महिला सदस्यहरुमा विमला कुमारी थापा बस्नेत, पार्वती अधिकारी पौडेल र राधा सापकोटा निर्वाचित भएका छन् ।

नवनिर्वाचित कार्यसमितिको कार्यकाल ४ वर्षको रहनेछ । नयाँ नेतृत्वले संस्थाको सेवा विस्तार र खानेपानी व्यवस्थापनलाई प्रभावकारी बनाउने प्रतिबद्धता जनाएको छ । ‘उपभोक्ताको हितमा काम गर्दै सेवालाई थप गुणस्तरीय बनाउने छौं,’ शर्माले भने । लेखनाथ क्षेत्रका १० वटा क्षेत्रमा अहिले करिब १८ हजार धाराहरु रहेका छन् ।

यो संस्थाले लेखनाथका उपभोक्तालाई गुणस्तरीय र स्वस्थकर खानेपानी वितरण गर्दै आएको छ । संस्थाको २५ औं रजत जयन्ती र २१ औं वार्षिक साधारणसभाका अवसरमा अधिवेशन गरिएको हो । नयाँ कार्यसमितिले पूर्वाधार विकासमा ध्यान दिने उपभोक्ताले आशा गरेका छन् । निर्वाचन प्रक्रियाले संस्थाको लोकतान्त्रिक अभ्यासलाई थप बलियो बनाएको सहभागीहरुले बताएका छन् ।