रोल्पा, रोल्पाको जलजला क्षेत्रमा तीर्थयात्री बोकेको जिप दुर्घटनामा ज्यान गुमाउनेको संख्या बिस पुगेको छ । रोल्पाको थवाङ गाउँपालिका–१ जलजलामा रुकुमपूर्वबाट जलजलातर्फ जाँदै गरेको जिप बिहीबार दिउँसो भिरबाट करिब ८ सय मिटर तल खसेर दुर्घटना भएको थियो ।
भोलि बैशाख १८ गते लाग्ने वैशाखे पूर्णिमामा पूजा गर्न रुकुमपूर्वबाट तीर्थयात्री बोकेर गएको जिप रोल्पाको थवाङ गाउँपालिकामा पर्ने जलजला क्षेत्रमै दुर्घटनामा परेको इलाका प्रहरी कार्यालय थवाङका प्रहरी निरीक्षक रामचन्द्र बगालेले जानकारी दिए । उनका अनुसार लु १ ज ४१६७ नम्बरको बोलेरो जिप दुर्घटनामा परेको हो।
प्रहरी निरिक्षक बगालेका अनुसार दुर्घटना भएको क्षेत्रमा भारी वर्षा भएका कारण उद्धार कार्यमा समेत कठिनाइ भएको थियो । जिल्ला प्रहरी कार्यालयका प्रमुख डीएसपी वीरेन्द्रवीर विश्वकर्माका अनुसार जिप भिरबाट निकै तल खसेको थियो जिप खसेको ठाउँसम्म प्रहरी र उद्धार टोली पुगेर उद्वार गरेको थियो।
