नुवाकोट, प्रतिनिधिसभाको निर्वाचनमा पराजय व्यहोरेका नेपाली कांग्रेसका नेता डा. प्रकाशशरण महतले पटकको निर्वाचनमा देखिएको परिणामलाई अस्वाभाविक भन्दै स्थापित पार्टीहरूप्रति मतदाताको असन्तुष्टि र सामाजिक सञ्जालको नियोजित प्रयोगलाई हारको मुख्य कारणको रुपमा उल्लेख गरेका छन उनले भदौ २३ गतेको घटनाको प्रभावका कारण पनि चुनावी नतिजा प्रभावित भएको समेत स्मरण गरेका छन।

नुवाकोट जिल्लाको क्षेत्र न.१ बाट चुनाबी प्रतिष्पर्धामा रहेका डा. महतले आफू पराजित भए पनि प्रतिकूल अवस्थामा साथ दिने मतदाता र पार्टी कार्यकर्ताप्रति उनले आभार प्रकट गर्दै आगामी दिनमा पनि क्षेत्रको विकास र जनताको सेवामा निरन्तर लागिरहने प्रतिबद्धता समेत जनाएका छन उनले विजयी उम्मेदवार डा. बिक्रम तिमिल्सिनालाई बधाई तथा शुभकामना पनि दिएका छन्।

उनले लेखेका छन्, ‘यस पटकको आम निर्वाचनमा देखिएको अस्वाभाविक परिणामका पछाडि स्थापित पार्टीहरू प्रति मतदाताहरूको असन्तुष्टि, सामाजिक सञ्जालको नियोजित प्रयोग, भदौ २३ गतेको घटनाको प्रभाव लगायतका धेरै कारणहरू छन्। यसको विश्लेषण हुने नै छ। नेपाली कांग्रेस पार्टी यो प्रभावबाट अछुतो रहेन।’

‘नुवाकोट–१ मा पनि यसको प्रभाव रह्यो। यस्तो प्रतिकूलताका बाबजुद पनि प्रतिस्पर्धी मत दिएर म र मेरो पार्टीलाई विश्वास गर्नुहुने सम्पूर्ण मतदाताहरूप्रति आभारी छु र धन्यवाद दिन चाहन्छु। यस क्षेत्रको विकास र जनताको सेवामा सधैँझैँ लागिरहने नै छु। चुनाव प्रचार–प्रसार अभियानमा अहोरात्र खटिने सम्पूर्ण पार्टीका साथीहरू, शुभचिन्तक र समर्थक सबैलाई हार्दिक धन्यवाद दिन चाहन्छु। निर्वाचित रास्वपाका उम्मेदवार डा. बिक्रम तिमिल्सिनालाई बधाई र शुभकामना व्यक्त गर्दछु।’

आइतबार राति सम्पन्न मतगणनाको अन्तिम परिणाम अनुसार तिमिल्सिना २२ हजार ६०९ मतसहित विजयी भएका हुन्। निकटतम प्रतिस्पर्धी महतले १८ हजार ५९७ मत प्राप्त गरे।  यस्तै नेकपाका हितबहादुर तामाङले १३ हजार ३७७ मत ल्याउँदा नेकपा एमालेका बद्री मैनाली ८ हजार ९३२ मतमा सीमित भए। नुवाकोटका दुवै निर्वाचन क्षेत्रमा जित निकाल्दै रास्वपाले क्लिन स्वीप गरेको छ।