पोखरा, नेपाली काँग्रेसको बिशेष महाधिबेशनबाट पार्टीको महामन्त्री बनेका प्रदिप पौडेल र गुरुराज घिमिरे दुबै जनाले यस पटकको प्रतिनिधि सभाको निर्बाचनमा पराजय भोग्नुपरेको छ। पौडेलले २०७४ को निर्बाचनमा तनहुँ जिल्लाको क्षेत्र न.२ को एक प्रदेशबाट झिनो मतले पराजित भएको भएपनि २०७९ को चुनाबमा भने काठमाडौँ -५ बाट नेकपा एमालेका नेता इश्वर पोखरेललाई ५ हजार २५० मतले पराजित गरेर संसद्को यात्रा तय गरेका थिए ।

तर यसपटक पौडेल र घिमिरे दुवैजना रास्वपाका उमेदवारहरुसंग फराकिलो मतान्तरले पराजित भएका छन । काठमाडौं–५ मा रास्वपाका उम्मेदवार सस्मित पोखरेल ३० हजार ७३७ मतसहित विजयी हुँदा उनका निकटतम प्रतिस्पर्धी कांग्रेस महामन्त्री प्रदीप पौडेलले ९ हजार १५९ मत मात्र प्राप्त गरेका छन् । यससँगै कांग्रेस महामन्त्री पौडेल रास्वपाका उमेदवार पोखरेलसँग २१ हजार ५७८ मतको अन्तरले पराजित बनेका छन।

यसपटक त्यस क्षेत्रबाट उमेदवार बनेका नेकपा एमालेका इश्वर पोखरेलले ४ हजार ७०१, राष्ट्रिय प्रजातन्त्र पार्टीका कमल थापाले १ हजार ७२९ मत र उज्यालो नेपाल पार्टीका श्रीराम गुरुंगले १ हजार १ सय मत पाएका छन भने अन्य उमेदवारको मत १ हजार भन्दा कम रहेको छ ।

यस अगाडिको निर्बाचनमा कांग्रेसको उमेदवार रहेका पौडेलले १५ हजार २६९ मत पाएर बिजयी बन्दा नेकपा एमालेका उमेदवार इश्वर पोखरेलले १० हजार १९० मत मात्र प्राप्त गरेका थिए। त्यस निर्बाचनमा रास्वपाको तर्फबाट उमेदवार बनेका डा. प्रणय शमशेर राणाले ५ हजार ४७७ मत पाएको थिए तर यसपटक उनि रास्वपा पार्टी परित्याग गरि नेपाली काँग्रेसमा प्रवेश गरेका थिए।

यसैगरी, मोरङ–४ मा पनि रास्वपाका उम्मेदवार सन्तोष राजवंशीले कांग्रेस महामन्त्री गुरुराज घिमिरेलाई फराकिलो मतान्तरले पराजित गरेका छन्। राजवंशीले ४० हजार ८३३ मत प्राप्त गर्दा घिमिरेले १२ हजार १४७ मत ल्याएका छन्। यस क्षेत्रमा घिमिरे २८ हजारभन्दा बढी मतान्तरले पराजित भएका हुन्। त्यस क्षेत्रमा नेपाली कम्युनिष्ट पार्टीका उमेदवार अमनलाल मोदीले १० हजार ७६२, नेकपा एमालेका जिबन घिमिरेले ६ हजार ९३३ र राप्रपाका माधव प्रसाद आचार्यले १ हजार ४७ मत पाएका छन।

यस निर्वाचन परिणामसँगै प्रमुख दलका प्रभावशाली नेताहरू समेत नयाँ शक्तिको रुपमा उदाएको राष्ट्रिय स्वतन्त्र पार्टीका उमेदवारसंग पराजित बन्न पुगेका छन । विश्लेषकहरूका अनुसार मतदाताको बदलिँदो मनोविज्ञान र नयाँ राजनीतिक शक्तिप्रतिको आकर्षणका कारण यस्तो परिणाम आएको हो।