पोखरा, मधेश प्रदेशको मुख्यमन्त्री नियुक्तिको बिषयलाई लिएर मधेस प्रदेश प्रमुखको कार्यालयमा तोडफोड गरिएको छ ।  मधेसका नेपाली कांग्रेसलगायत सात दलका नेता र कार्यकर्ताले मुख्यमन्त्री कार्यालयपछि प्रदेश प्रमुख सुमित्रा सुवेदी भण्डारीको कार्यालय तोडफोड गरेको बताइएको छ। मधेश प्रदेश प्रमुख सुमित्रा सुवेदी भण्डारीको राजीनामाको माग गर्दै नेपाली कांग्रेस, जसपा, लोसपा सहितका प्रदेश सांसद र कार्यकर्ताहरूले प्रदेश प्रमुखको कार्यलयसंगै प्रदेश अन्तर्गतका केहि मन्त्रालयमा समेत तोडफोड गरेका छन।

मधेश प्रदेशकी प्रमुख सुमित्रा भण्डारीले सोमबार बिहान नेकपा एमाले संसदीय दलका नेता सरोजकुमार यादवलाई मुख्यमन्त्रीमा नियुक्त गरेकी थिइन् । उनको नियुक्तिलाई लिएर अने दल र सर्बसाधारण समेत बिरोधमा उत्रिएका हुन। नयाँ मुख्यमन्त्री नियुक्ती प्रक्रियालाई लिएर प्रदेश सभामा रहेका ७ राजनीतिक दलले पनि विरोध जनाउंदै तोडफोड गरेको हुन।

उनीहरुले मुख्यमन्त्री तथा मन्त्रीपरिषदको कार्यालयका प्रमुख सचिवको कार्यकक्षमा तोडफोड गरेको थिए।  तोडफोड गर्न जानेहरुमा मधेश प्रदेशका सांसदहरू समेत रहेका थिए । उनीहरुले मधेश प्रदेश सरकारका प्रमुख सचिवको कार्यकक्षमा रहेको नेपालको राष्ट्रिय झण्डा समेत फ्याँकिदिएका थिए।

प्रदेश सांसद लगायतको टोलीले आएर खेलकुदको कबर्डहलमा बनाइएको मुख्यमन्त्री कार्यालयमा तोडफोड गर्नुका साथै मन्त्रालयहरुमा तालाबन्दी गरेर गएको कार्यालयका सूचना अधिकारी उपसचिव बासुदेव मल्लले जानकारी दिए। ‘अहिले मुख्यमन्त्रीको कार्यकक्ष गृह सञ्चार तथा कानुन मन्त्रालयमा राखिएको छ।

मुख्यमन्त्रीको कार्यालय अर्को ठाउँमा छ।  सांसद र कार्यकर्ताहरु आउनुभएको थियो, त्यहाँ गएर भित्र तोडफोड पनि भयो। एकदुई जना कर्मचारीलाई हातपात समेत भयो,’ उनले भने, ‘सचिवज्यूहरु आइपुग्नु भएको थिएन, उप सचिवको हैसियतले सबै कर्मचारीलाई आफ्नो सुरक्षा गर्न घर जानुस भनेर पठाइदिएँ।’