पोखरा, जननायक बीपी कोइराला स्मृति ट्रष्टले प्रत्येक वर्षको बीपी जन्मजयन्तीका अवसरमा प्रदान गर्दै आएको बीपी कोइराला स्मृति साहित्य सम्मान पुरस्कार र बीपी कोइराला स्मृति प्रजातन्त्र सेनानी सम्मान पुरस्कार यस बर्ष वरिष्ठ साहित्यकार डा. बेन्जु शर्मा र अर्जुन खड्कालाई प्रदान गरिने भएको छ ।

यस बर्ष ११२औं बीपी जन्मजयन्ती मनाउने क्रममा वर्ष २०८२ को बीपी साहित्य सम्मान पुुरस्कार वरिष्ठ साहित्यकार डा. बेन्जु शर्मा (काठमाडौं) लाई र बीपी सेनानी सम्मान पुरस्कार प्रजातन्त्र स्थापनाको संघर्षमा महत्वपूर्ण योगदान पुर्‍याउने अर्जुन खड्का (उदयपुर) लाई प्रदान गर्ने निर्णय ट्रष्टले गरेको छ ।

बीपी साहित्य सम्मान पुरस्कारको राशी नगद एक लाख एक हजार रुपैया र सम्मान पत्र रहेको छ भने बीपी सेनानी सम्मान पुरस्कारको राशी नगद ५१ हजार रुपैया र सम्मानपत्र रहेको छ ।

जननायक बीपी कोइराला स्मृति ट्रष्ट पुरस्कार छनौट समितिका संयोजक रामचन्द्र पोखरेल एबम सदस्यहरु श्रीमती किरण यादव र बागमती प्रदेश सांसद हरिप्रभा श्रेष्ठ खड्गीको सम्मिलित छनोट समितिको बैठकले गरेको निर्णयका आधारमा दुवै पुरस्कार प्रदान गरिने भएको हो ।

दुवै सम्मान एबम पुरस्कारहरु राष्ट्रपति रामचन्द्र पौडेलको प्रमुख आतिथ्यतामा यहि भाद्र २४ गते मंगलबार राष्ट्रपति कार्यालय, शितलनिवासमा हुने विशेष समारोहमा प्रदान गरिने कार्यक्रम रहेको छ ।

गत वर्ष २०८१ को साहित्य सम्मान द्वारिका श्रेष्ठ (काठमाडौं) र प्रजातन्त्र सेनानी सम्मान भोजराज भण्डारी (कास्की) लाई प्रदान गरिएको थियो । यी सम्मान तथा नगद पुरस्कारहरु बीपी ट्रष्टले जननायक बीपी कोइरालाको शतवार्षिक वर्ष २०७१ बाट निरन्तर प्रदान गर्दै आएको ट्रष्टका महासचिब रामचन्द्र पोखरेलले गुरुकुल खबरलाई जानकारी दिएका छन ।