पोखरा, नेपालका कानुन व्यवसायीहरूको साझा अनि छाता संस्थाको रुपमा रहेको नेपाल बार एसोसिएसनको नयाँ केन्द्रीय कार्यसमिति चयनका लागि चुनाब हुन एक महिना बढी बाँकी छ। आगामी चैत २३ गते कार्यसमिति चयनको लागि निर्वाचन मिति तय भइसकेको र निर्बाचनका लागि ११ हजार ७ सय ७२ जनाको प्रारम्भिक नामावलीसमेत सार्वजनिक भइसकेको छ ।

निर्बाचन कार्यक्रम अनुसार फागुन १८ गतेसम्म दाबी–विरोधको समय तोकिएको छ भने फागुन २० गते मतदाताको अन्तिम नामावली सार्वजनिक हुनेछ  फागुन २२ गतेको दिन उम्मेदवारी दरखास्त आह्वान गर्ने गरि निर्बाचन कार्यतालिका तयार भएको छ ।

निर्बाचनको मिति नजिकिंदै गएपछि प्रमुख दल सनाग सम्बन्धित कानुन ब्यबसायीका संस्थाहरु चुनाबी रणनीति र उमेदवार छनोट गर्ने प्रक्रियामा जुट्न थालेका छन। उम्मेदवारी मनोनयनको समयावधि एक साता मात्रै बाँकी रहे पनि कानुन ब्यबसायीका संस्थाहरु मिलेर चुनाबमा जाने वा एक्लाएक्लै चुनाबमा जाने भन्ने निर्णय भैसकेको छैन। विभिन्न दल निकट कानुन व्यवसायीहरूका संगठनहरु आफ्नो संगठनको तर्फबाट  उम्मेदवारको टुंगो लगाउने कसरतमा भने निरन्तर जुटेका छन् ।

नेपाल बारको अध्यक्षका लागि नेपाली कांग्रेस निकट डेमोक्रेटिक लयर्स एसोसिएसन (डीएलए)बाट पाँच जना र नेकपा एमालेनिकट प्रगतिशील तथा पेसागत कानुन व्यवसायी संगठन (पीपीएलए)बाट तीन जना आकांक्षी देखिएका छन् ।

डीएलएले अध्यक्षका आकांक्षीका लागि मागेको आवेदनमा यदुनाथ खनाल, विजय मिश्र, खम्मबहादुर खाती, योगेन्द्र प्रसाद अधिकारी र योगेन्द्रबहादुर अधिकारीले आकांक्षा देखाएका छन भने नेकपा एमाले सम्बद्ध कानुन व्यवसायीको संगठन पीपीएलएबाट टीकाराम भट्टराई, ईश्वरीप्रसाद भट्टराई र रमेश कोइरालाले नेपाल बारको अध्यक्ष पदमा चुनाब लड्ने इछ्या देखाएका छन् ।

यसैगरी माओवादीनिकट गणतान्त्रिक कानुन व्यवसायी संगठन (आरपीएलए) बाट हालसम्म रमन श्रेष्ठले दाबी गरेको छन भने नेकपा एकीकृत समाजवादी निकट समाजवादी पेसागत कानुन व्यवसायी संगठन (एसपीएलए) बाट भने हालसम्म कुनै पनि अधिवक्ताले अध्यक्षमा दाबी पेस गरिसकेका छैनन् ।

उम्मेदवारी मनोनयनको मिति नजिकिएसँगै आकांक्षीहरूले दाबी पेस गरे पनि गठबन्धन कुन संगठनबिच हुन्छ भन्ने भने तय भइसकेको छैन । यद्यपि, हालसम्मको स्थिति सरकारमा सहभागी दल नेपाली कांग्रेस र नेकपा एमालेनिकट कानुन व्यवसायीहरू छुट्टाछुट्टै गठबन्धन बनाएर चुनावमा होमिन सक्ने देखिएको छ । अर्थात्, नेपाल बारको निर्वाचनमा पनि सर्वोच्च बारमा बनेको गठबन्धनले निरन्तरता पाउने सम्भावना देखिएको छ ।

यसअघि गत पुस तेस्रो साता सम्पन्न सर्वोच्च बार एसोसिएसनको निर्वाचनमा कांग्रेस–एस र माओवादी–एमालेनिकट संगठनहरूबिच गठबन्धन भएको थियो । नेपाल बारको निर्वाचनमा पनि सोही गठबन्धन अघि बढ्न सक्ने सम्भावना छ । यद्यपि, हालसम्म को सँग गठबन्धन हुने भन्ने विषय तरल नै रहेको अधिवक्ताहरू बताउँछन् ।

‘एमाले र माओवादीबिच गठबन्धन हुने लगभग पक्काजस्तो भएको सुनेका छौँ । तर अहिले नै भन्न सकिन्न । हामी एसपीएलएसँगै अन्य घटकसँग पनि छलफलमै छौँ,’ डीएलएनिकट एक अधिवक्ताले बताए । गठबन्धन कस्तो बन्छ त्यसअनुसार उम्मेदवारको टुंगो लाग्ने उनको भनाइ छ ।

उनले डीपीएलएमा गठबन्धन नगरी जाने छलफल पनि भएको बताए । ‘संगठनभित्र कसैसँग गठबन्धन नगरी जाने छलफल पनि नभएको होइन। तर छुट्टाछुट्टै लडौँ भने पनि राजनीतिक हिसाबले माथि रहेका तीन वटा दल मिलेर हराइदिन्छन् कि भन्ने पनि कुरा उठेको छ,’ उनले भने, ‘कोसँग गठबन्धन गर्ने ? कसरी जाने ? भन्ने विषयमा अझै पक्का भएको छैन । जतासुकैबाट जाने अवस्था पनि छ ।’

कांग्रेसनिकट डीएलएले एकीकृत समाजवादीनिकट एसपीएलएसँग मिलेर चुनावमा होमिन खोजे पनि यता एसपीएलएको संगठन भने निरन्तर आफूहरूसँग पनि छलफलमा रहेको माओवादीनिकट कानुन व्यवसायीहरूको दाबी छ । ‘अहिलेसम्मको स्थिति हेर्दा पीपीएलए र आरपीएलएबीच गठबन्धनको सम्भावना देखिएको छ । एसपीएलसँग पनि हामी छलफलमै छौँ । तर हालसम्म उहाँहरू डीएलएतर्फ जानुहुन्छ वा यता आउनुहुन्छ भन्ने स्पष्ट भइसकेको छैन,’ ती अधिवक्ताले बताए ।