पोखरा, उड्न लागेको जहाजको आपतकालिन ढोका एक्कासी यात्रुले खोलेपछि उडान तालिका हेरफेर गरिएको छ । पोखराबाट काठमाडौंका लागि उड्न लागेको बुद्ध एयरको विमानका यात्रुले आकस्मिक ढोका खोलेका थिए ।

यसबाट उडान प्रभावित हुन पुगेको बुद्ध एयरले जानकारी दिएको छ । बिहान ९ बजेर ४० मिनेटमा पोखराबाट काठमाडौं उड्न लागेको उडान नं. ६५२ को जहाजको आकस्मिक ढोका यात्रुले चलाउँदै गर्दा विमान ट्याक्सी वेबाट धावनमार्गमा जान लागेको थियो । सोही क्रममा ढोका खुलेको हो ।

यो घटना कसरी भयो र यात्रुबाट के कति कारणले ढोका खुल्न गएको हो, यसबारे पोखरा टर्मिनलका सुरक्षाकर्मीले अध्ययन गरिरहेका सो उडान कम्पनीले जनाएको छ । ढोका खोलेको विमान बुद्धएयरका प्राविधिकले जाँच गरिरहेको र काठमाडौं आउने यात्रुलाई अर्को विमानबाट ल्याउन लागेको पनि बुद्ध एयरले जानकारी दिएको छ ।