पोखरा । नेपाल लोकतन्त्रवादी आदिबासी जनजाति महासंघ कास्कीका कोषाध्यक्ष भीमकुमारी आलेलाई मातृशोक परेको छ । आलेकी ७० वर्षिय आमा अमिरकुमारी घलेको उपचारको क्रममा शुक्रबार बिहान मणिपाल अस्पताल पोखरामा निधन भएको हो ।

पोखरा महानगरपालिका वडा नं. २ का वडा सदस्य  समेत रहेकी आलेकी आमा स्व. अमिरकुमारीको गुरुङ संस्कार अनुसार  शुक्रबार अन्त्येष्टि गरिएको छ । स्व.घलेको अन्नपूर्ण गाँउपालिका वडा नं २ किम्चेमा अन्त्येष्टि गरिएको हो ।

चारमहिना अघि एक्कासी फोक्सोमा क्यान्सर भएको पत्ता लागेपछि उपचार गराईरहेको र उपचारकै क्रममा निधन भएको पारिवारिक स्रोतले जानकारी दिएको छ ।

स्व.घलेका वडा सदस्य आले ‘घले’ सहित तीन छोरी र ४ छोरा रहेका छन् ।

यसैबीच स्व.घलेको अमर आत्माको चीर शान्तिको कामना गर्दै नेपाली काँग्रेसका केन्द्रीय सदस्य शारदा पौडेल, पोखरा २ का वडा अध्यक्ष तथा संसदीय दलका नेता दिवसमान प्रधानांग, वडा नं २ का वडा सदस्य गौतम विजुक्छे, नेपाली काँग्रेस क्षेत्र नं ३ का क्षेत्रीय सभापति मनोज गुरुङ, नेपाली काँग्रेसका युवा नेता एवम्  साविक घान्द्रुक गाविसका पूर्व सभापति ललित गुरुङ, अन्नपूर्ण गाँउपालिका वडा नं.१० का वडाध्यक्ष गौतम गुरुङ, महिला संघ कास्कीका सभापति मीना पाण्डे र नेपाल लोकतन्त्रवादी आदिबासी जनजाति महासंघ कास्कीका सचिव रीता गुरुङले पार्थिव शरीरमा पुष्प अर्पण सहित भावपूर्ण श्रद्धाञ्जली अर्पण गरेका थिए ।