पोखरा, पत्रकार वासुदेव मिश्र पोखरा उद्योग वाणिज्य संघले प्रदान गर्ने आर्थिक पत्रकारिता पुरस्कारबाट सम्मानित भएका छन् ।

पोखरा उद्योग वाणिज्य संघ प्रत्यक २-२ वर्षमा यो पुरस्कार प्रदान गर्ने गर्छ । प्रदान गर्ने पुरस्कारको राशी २५ हजार रुपैयाँ, दोसल्ला र प्रमाण पत्र रहेको छ । संघको शनिबार आयोजित साधारणसभामा पोखरा महानगरका प्रमुख धनराज आचार्य र पोखरा उद्योग वाणिज्य संघका पवनकुमार प्रजापतिले मिश्रलाई पुरस्कार प्रदान गरेका हुन् ।

पोखरामा रही दुई दशक भन्दा लामो सक्रिय पत्रकारितामा रहेका मिश्र हाल प्रेस युनियनको सभापति छन् भने नेपाल खबर र ढोरपाटन दैनकमा कार्यरत छन् । मिश्र नेपाल पत्रकार महासंघ कास्कीद्वारा सञ्चालित स्वर्गीय गजेन्द्र भण्डारी स्मृति पत्रकारिता पुरस्कार र सुशासनका लागि नागरिक समाज (सुनास) ले प्रदान गर्ने सुशासन पत्रकारिता पुरस्कार लगायत विभिन्न पुरस्कारबाट यसअघि पुरस्कृत भइसकेका पत्रकार हुन् ।