पोखरा, अर्थमन्त्री डा. प्रकाशशरण महतले नेपालको पर्यटन क्षेत्रले चाँडै नै लय समात्नेमा आफू आसावादी भएको बताएका छन् । पोखरा पर्यटन परिषद्को २३ औं साधारणसभालाई सोमबार पोखरामा सम्वोधन गर्दै उनले पर्यटन र अर्थतन्त्रप्रति सकारात्मक भएर शोच्न व्यवसायीसँग आग्रह गरे ।
‘व्यवसायीले निरासा बाँड्नु भएन’, उनले भने, ‘जति निरासाका कुरा गर्यो उति माहोल नकारात्मक हुँदै जान्छ ।’ पोखरा अन्तर्राष्ट्रिय विमानस्थलबाट छिटै अन्तर्राष्ट्रिय उडान गर्न पहल भइरहेको दाबी पनि उनले गरे । भैरहवा र पोखरा जस्ता विमानस्थलले मात्र देशको आबश्यकता पुरा नहुने भन्दै उनले निजगढमा पनि सरकारले अन्तर्राष्ट्रिय विमानस्थल बनाउने बताए । काठमाडौंको त्रिभुवन अन्तर्राष्ट्रिय विमानस्थल अहिले साँघुरो महसुस हुन थालेको उनको भनाई थियो ।अर्थतन्त्र विस्तारै सुधार हुँदै गएको बताउँदै उनले यसप्रति आसावादी हुन व्यवसायीसँग आग्रह गरे ।
गण्डकी प्रदेश सरकारका उद्योग, पर्यटन, वन तथा वातावरण मन्त्री दिपेन्द्रबहादुर थापाले प्रदेशको पर्यटनलाई उचाई प्रदान गर्न सरकार लागि परिरहेको बताए । नेपाल उद्योग वाणिज्य महासंघका पूर्व अध्यक्ष आनन्दराज मुल्मीले नेपाल राष्ट्र बैंक र अर्थमन्त्रालयविच ट्युनिङ नमिल्दा अर्थतन्त्र सुध्रन गाह्रो भएको भनाई राखे ।
आयोजक संघका अध्यक्ष पोमनारायण श्रेष्ठले सरकार–माओवादी बिचको १० वर्षे राजनीतिक द्वन्द्व, २०७२ सालको महाभुकम्प, छिमेकी राष्ट्रबाट गरिएको नाकाबन्दी र महामारीकै रुप लिएको कोभिड– १९ को नकारात्मक प्रभावले नेपाली पर्यटन पटक–पटक थला पर्दै आएको स्मरण गराए । उनले बैंकको चर्को ब्याजको मारमा पर्यटन क्षेत्र परेको भनाई राखे ।
एकातिर बैंकको चर्को ब्याज र अर्कोतिर पर्यटक आगमनमा आएको न्यूनताले अहिले पर्यटन क्षेत्र दोहोरो चेपुवामा परेको उनले बताए । सो अवसरमा उनले विभिन्न छ बुँदे माग समेत सरकारसमक्ष राखेका थिए । पर्यटन क्षेत्रका तर्फबाट उनले राखेका मागहरु ।
१) कर्जाको पुनर्तालिकीकरण र पुनर्कर्जा पाउने व्यवस्था गर्दै बैंक ब्याजदर एकल अंकमा कायम गर्न पहल अगाडि बढाइयोस् । छ-सात प्रतिशतमा लिएको कर्जाको ब्याज बैंक तथा वित्तीय संस्थाले एकतर्फी १५-१६ प्रतिशत पु-याउँदा व्यवसायी अहिले प्रताडित हुन पुगेका छन् ।
२) पर्यटन क्षेत्रमा अहिले बैंक तथा वित्तीय संस्थाले लगानी गर्न नचाहने प्रवृत्ति देखिएको छ । त्यसकारण बैंक तथा वित्तीय संस्थाका लागि कृषिमा जस्तै पर्यटनमा पनि अनिवार्य कर्जा लगानीको व्यवस्था गरियोस् ।
३) नेपालमा पाँच सय दरका भारतीय नोट नचल्दा नेपाल घुम्न आउने भारतीय पर्यटक दुरुत्साहित हुन पुगेका छन् । यसले नेपाली पर्यटनप्रति नै नकारात्मक धारणा सिर्जना हुँदै गएको छ । अतः पाँच सय दरका भारतीय नोटको नेपालमा बैध संचालनका लागि मित्रराष्ट्र भारतसँग कुटनीतिक पहल अगाडि बढाइयोस् ।
४) आठ महिना अघि पोखरामा उद्घाटन गरिएको पोखरा अन्तर्राष्ट्रिय विमानस्थलबाट यथाशीघ्र अन्तर्राष्ट्रिय उडान संचालनका लागि पहल गरियोस् । यस्तो उडान नेपाल एयरलाइन्सबाट सुरुवात गरियोस् ।
५) पृथ्वी राजमार्ग अन्तर्गत मुग्लिन–पोखरा सडक खण्डमा जारी स्तरोन्नती कार्यलाई व्यवस्थित र तीव्र बनाई समयमै काम सक्ने वातावरण बनाइयोस् । स्थलमार्ग हुदै नेपाल भित्रिने पर्यटकहरुलाई सहज र मुख्य शहरसम्मको यात्रा सुविधाका लागि अन्य राजमार्गहरुको समेत सुधार गरियोस् ।
६) पर्यटनमा विदेशी लगानी भित्र्याउन आबश्यक कदमहरु चालियोस् । नेपालमा विदेशी पर्यटक भित्र्याउन सरकारले नै वृहत योजना बनाई उचित बजेट व्यवस्था गर्दै पर्यटनलाई विदेशी मुद्रा आर्जनको प्रमुख श्रोतको रुपमा रहने गरी प्राथमिकिकरण गरियोस् ।
कार्यक्रममा होटल संघ पोखरा नेपालका अध्यक्ष लक्ष्मण सुवेदी, कास्कीका प्रमुख जिल्ला अधिकारी बासुदेव घिमिरे, परिषद्का निवर्तमान अध्यक्ष गोपिवहादुर भट्टराई, महासचिव सञ्जयकान्त सिग्देल लगायतले भनाई राखेका थिए ।
