पोखरा । गत मे २९ तारिखमा एडमन्ड हिलारी एभरेष्ट म्याराथनमा सहभागि भई फर्किएका सूर्य गुरुङको टोलीलाई सोमबार एक कार्यक्रमका बीच पोखरामा बिदाई गरिएको छ ।
कास्कीको अन्नपूर्ण गाउँपालिका वडा नं १० घान्द्रुकमा रहेको श्री मेश्रम बराह माध्यमिक विद्यालयका दश जोड दूई शिक्षाकालागि म्याराथनमा सहभागि सो टोलीलाई श्री मेश्रम बराह माध्यमिक विद्यालय अर्थ संकलन समिति ले एक कार्यक्रमका बीच विदाई गरेको हो ।
विश्वकै सर्वाधिक जोखिमपूर्णका साथै सुन्दर मानिने एभरेष्ट म्याराथनको संयोजक, भूतपूर्व ब्रिटिस आर्मी तथा बेलायतमै बसोबास गर्दै आईरहेका सूर्य गुरुङ लगायत तर्कजंग गुरुङ, जुमप्रसाद गुरुङ र जीतबहादुर गुरुङलाई शुभकामनाका साथमा विदाई गरिएको थियो ।
कार्यक्रममा एभरेष्ट म्याराथन सफलतापूर्वक सम्पन्न गर्न सफल घान्द्रुककै चेली तथा पोखरा फाइनान्सका म्यानेजर बुद्धिलक्ष्मी गुरुङलाई पनि बधाई ज्ञापन गरिएको थियो ।
कार्यक्रममा श्री मेश्रम बराह माध्यमिक विद्यालय अर्थ संकलन समितिका उपसमिति संयोजक क्या.कमल गुरुङ, मेजर ललित गुरुङ, मेजर प्रेम थापा, विष्णु गुरुङ, कृष्ण गुरुङले एभरेष्ट म्याराथन मार्फत संकलित रकम विद्यालयको शैक्षिक विकासमा खर्च गरिने बताउँदै सहयोगप्रति आभार व्यक्त गरेका थिए ।
एभरेष्ट म्याराथनका लागि सूर्य गुरुङको टिमले गोफन्ड मार्फत विद्यालय शिक्षाका लागि करिव १८ लाख रुपैयाँ संकलन गरी केही दिन अघि घान्द्रुकमा एक कार्यक्रमका बीच अर्थ संकलन उपसमितिलाई हस्तान्तरण गरेका थिए ।
