पोखरा, नेपाल शिक्षक संघ कास्कीको नबौं अधिवेशनबाट संघको कास्की जिल्ला अध्यक्ष बन्न तिन जना शिक्षक नेताहरुले उमेदवारी दर्ता गराएका छन ।
अध्यक्ष बन्नका लागि संघका वर्तमान कास्की जिल्ला सचिव राजु क्षेत्री, संघका पुर्व केन्द्रीय सदस्य बसन्तराज पाण्डे र संघका निवर्तमान पोखरा महानगर अध्यक्ष भोलानाथ पौडेलले उमेदवारी दर्ता गराएका छन ।
तिन उमेदवारहरु मध्ये कुनै एकको उमेदवारी फिर्ता हुन सक्ने र दुई जना बिच प्रतिस्पर्धा हुन सक्ने अनुमान गरिएको छ ।कास्की कांग्रेस भित्र देखिएको गुटको असर शिक्षक संघमा पनि पर्न सक्ने कतिपयको अनुमान रहेपनि शिक्षकहरुले शिक्षकको हितमा काम गर्न सक्ने र शिक्षक संघको संस्थागत हितमा काम गर्न सक्नेलाई छानेर मतदान गर्ने विश्वास अधिकांशको रहेको छ ।
संघको कास्की जिल्ला उपाध्यक्ष खुला तर्फ रामचन्द्र ओझा र रुम बहादुर खवासले उमेदवारी दर्ता गराएका छन भने महिला उपाध्यक्ष तर्फ टिका देवी भण्डारी न्यौपाने, सिता देवी भण्डारी र सावित्री अर्यालको उमेदवारी परेको छ ।
संघको सचिवमा तारानाथ भण्डारी र निर्मल आचार्यको तथा अर्थ सचिवमा यम प्रसाद भण्डारी, पुर्ण बहादुर थापा र द्रोण सुवेदीको उमेदवारी दर्ता भएको छ ।
यसैगरि संघको कास्की जिल्ला सहसचिवमा खुला तर्फ मोहन प्रसाद तिवारी, बसन्तराज सापकोटा, ढकराज सुवेदी र दीपेन्द्र बस्टाकोटीको उमेदवारी परेको छ तर महिला सहसचिवमा भने सन्जु कुमारी शर्मा एकजनाको मात्र उमेदवारी परेको छ ।
दुईजना समावेशी सहसचिव चाहिनेमा जुनकिरी दर्जी र निर्मला मानन्धरको मात्र र अर्थ सहसचिवमा पनि राधिका बांसतोला भण्डारीको मात्र उमेदवारी परेको भएपनि समावेशी अर्थ सहसचिवमा पुर्ण प्रसाद गुरुडं, उत्तम कुमार श्रेष्ठ, र कृष्ण बहादुर भुजेलले उमेदवारी दिएका छन ।
नेपाल शिक्षक संघको पोखरा महानगर समितिको अधिवेशनको उद्घाटन समारोह भएर उमेदवारी दर्ता भएपनि हाल सम्म मतदान प्रक्रिया शुरु हुन नसकेको अवस्था हेर्दा कास्कीको जिल्ला अधिवेशनको स्थिति पनि त्यस्तै हुने त हैन भनेर चिन्ता गर्नेहरु पनि प्रशस्त छन।
भोलानाथ पौडेल अध्यक्ष रहेको पोखरा महानगर समितिको अधिवेशनको उद्घाटन समारोह सकिएको दुई महिना सम्म मतदान प्रक्रिया शुरु हुन सकेको छैन तर उनि अहिले कास्की जिल्ला अधिवेशन बाट जिल्ला अध्यक्ष बन्नका लागि उमेदवारी दर्ता गराएका छन ।
नेपाल शिक्षक संघका कास्की जिल्ला भरी १ हज़ार ७ सय ७३ जना सदस्य अर्थात् मतदाता रहेका छन भने पोखरा महानगर भित्र १ हज़ार २ सय ७८ सदस्य रहेका छन ।
शिक्षक संघको जिल्ला र महानगरको नेतृत्व चयन गर्नका लागि एकै दिन मतदान गर्ने व्यवस्था मिलाउन सके गाउंगाउंबाट मतदानको लागि आउने शिक्षकहरुलाई सहज हुने कतिपयले बताएका छन ।
शिक्षक संघको महानगर र ज़िल्लाको अधिवेशन अनिश्चित बनेपछि शिक्षकहरुबाट नै तत्काल अधिवेशन गर्नुपर्ने भन्दै आवाज़ उठेको थियो ।
गण्डकी प्रदेशका सबै जिल्लामा जिल्ला अधिवेशन सकिएको र प्रदेश एवं केन्द्रीय अधिवेशनको मिति समेत तोकिएको अवस्थामा संघको पोखरा महानगर अधिवेशन र कास्की जिल्ला अधिवेशन अनिश्चित बनेपछि नेपाली कांग्रेस कास्कीले समेत यस बारेमा चासो प्रकट गरेको थियो ।
शिक्षक संघका महानगर र जिल्ला स्तरका नेताहरुलाई कास्की कांग्रेसको कार्यालयमै बोलाएर यथाशीघ्र अधिवेशन गर्नका लागि कास्की कांग्रेसका सभापति किशोरदत्त बराल र कांग्रेसको शुभेच्छुक संस्था समन्वय शाखाका प्रमुख गंगाधर पराजुली लगायतले आग्रह समेत गरेका थिए ।
कास्की कांग्रेसका सभापति बरालले आंफ्नो राजनीतिक पृष्ठभूमि समेत शिक्षक संघ नै रहेकोले शिक्षक संघ भित्र हुने कमी कमजोरीको दोष आंफुले समेत लिनुपर्ने अवस्था रहेको भन्दै कास्कीको शिक्षक संघ अन्य जिल्लाको तुलनामा नमुना बनेर काम गर्न सक्नुपर्ने बताएका थिए
शिक्षक संघ कांग्रेसको शुभेच्छुक संस्था भएको नाताले कांगेसले चासो राख्नु स्वभाविक रहेको भन्दै पराजुलीले कांग्रेसले राम्रो नगर्दा शिक्षक संघका साथीहरुलाई समेत आरोप आउन सक्ने र शिक्षक संघका साथीहरुले राम्रो नगर्दा कांग्रेस माथी समेत आरोप लाग्न सक्ने भएकोले सकेसम्म रचनात्मक काम गर्न र संस्थाको बिधान अनुसारका गतिविधि गर्नुपर्नेमा जोड दिएका थिए ।
उक्त भेटघाटमा संघका जिल्ला अध्यक्ष रमेश भट्टराई, पोखरा महानगर अध्यक्ष भोला पौडेल, पुर्व केस बसन्त पाण्डे, सचिव राजु क्षेत्री, दुर्गा बराल लगायतले केही प्राविधिक समस्याका कारण अधिवेशनमा ढिलाई भएको जानकारी दिंदै तत्काल अधिवेशन गर्न आवश्यक तयारी शुरु गरिएको जानकारी गराएका थिए ।
उक्त भेटघाट भएको तिन दिन पछि संघको जिल्ला अधिवेशनको उद्घाटन समारोह सम्पन्न भएर उमेदवारी समेत दर्ता भैसकेको भएपनि नेतृत्व चयनका लागि कहिले मतदान गर्ने भन्ने विषय अझै टुंगिएको छैन ।
नेपाली कांग्रेस गण्डकी प्रदेशका सभापति शुक्रराज शर्मा प्रमुख अतिथि रहेको अधिवेशनको उद्घाटन समारोहमा नेपाली कांग्रेस कास्कीका सभापति किशोरदत्त बराल, पुर्व सभापति यज्ञ बहादुर थापा र कृष्ण केसी सहित कांग्रेसका जिल्ला उपसभापति युवराज कुंवर, नेपाल ट्रेड युनियन कांग्रेस गण्डकीका अध्यक्ष मुरारी शर्मा, शिक्षक संघका गण्डकी प्रदेश अध्यक्ष शिरोमणि लामिछाने, कास्की कांग्रेस क्षेत्र ३ का सचिव लक्ष्मीप्रसाद पौडेल, शिक्षक संघ तनहु र स्यांजाका अध्यक्ष क्रमशः रमेश बाबु भट्टराई र पशुपति पौडेल, लम्जुडंका पुर्व अध्यक्ष शिवराज अधिकारी, कास्कीका शिक्षक नेताहरु बसन्त पाण्डे, राजेन्द्र पौडेल, बिंदुर चन्द्र ढकाल, सुमना सुबेदी, चन्द्रमणी पौडेल, भोलानाथ पौडेल, संघका कास्की जिल्ला अध्यक्ष रमेश भट्टराई, उपाध्यक्ष खिमनाथ तिमिल्सिना र सचिव राजु क्षेत्री लगायतले शिक्षकहरुका विभिन्न समस्या र सरकारको तर्फबाट गर्नुपर्ने कामका बारेमा चर्चा गरेका थिए ।
जिल्ला अधिवेशन सम्पन्न गर्न शम्भुराज बांस्तोलाको संयोजकत्वमा निर्वाचन समिति बनाईएको छ ।
नेपाल शिक्षक संघ कास्कीको कार्यसमितिका विभिन्न पदमा उमेदवारी दिनेहरुको नामावली
प्रतिक्रिया लेख्नुहोस्:-