पोखरा, आगामी चैत्र ५ गते हुने स्वतन्त्र विधार्थी युनियनको निर्वाचनका लागि त्रिभुवन विश्वविद्यालयले निर्धारण गरेको समय तालिकामा पोखरामा रहेका कलेजहरु मध्ये दुईवटा कलेजमा मात्र विधार्थी संगठनबाट उमेदवारी दर्ता भएको छ ।
स्वबियुको चुनाब हुने भनिएका कलेजहरु पृथ्वीनारायण बहुमुखी क्याम्पस, जनप्रिय बहुमुखी क्याम्पस र बन विज्ञान अध्ययन संस्थानको पोखरा क्याम्पसमा विभिन्न बिधार्थी संगठनको नामबाट तालाबन्दी गरिएको र तालाबन्दी खुलेपनि अन्य बिवादका कारण निर्वाचन कार्यक्रम प्रभावित भएकोले उमेदवारी दर्ता गर्ने कार्य प्रभावित हुन पुगेको हो ।
बिन्दुवासिनी संस्कृत क्याम्पसमा भने आईतबार मात्र उमेदवारी दर्ता गर्ने कार्यक्रम रहेको छ ।
चिकित्सा शास्त्र अध्ययन संस्थान पोखरा क्याम्पसको स्वतन्त्र विधार्थी युनियनको लागि नेपाल बिधार्थी संघको तर्फबाट सभापतिमा अनुष्ठा चापागांई, सचिवमा ममता शर्मा, कोषाध्यक्षमा कृष्टिना कायस्थ र सदस्यहरुमा अन्जु थापा, सुष्मा बराल, सरस्वती खनाल,सुस्मिता जयसवाल र संचिता दाहालले खुला तर्फबाट उमेदवारी दर्ता गराएका छन ।
नेविसंघको तर्फबाट समानुपतिक सदस्यमा श्वेता कोईराला, नम्रता चापागाईं, विष्णु सापकोटा, विना मुस्याखो, सुस्मा चौधरी, स्विकृति पन्त र करुणा गौतमको उमेदवारी परेको जानकारी नेविसंघ कास्कीका उपसभापति एवं नर्सिंग क्याम्पसमा नेविसंघ कास्कीको प्रतिनिधि महादेव गिरीले गुरुकुल खवरलाई जानकारी दिए ।
नर्सिंग क्याम्पसमा नेकपा एमाले निकट अनेरास्वबियुको तर्फबाट सबै जसो पदमा प्यानल नै उमेदवारी दर्ता भएको छ । जस अनुसार अनेरास्वबियुले अन्जना अधिकारीलाई सभापतिको उमेदवार बनाएर उनकै नेतृत्वमा प्यानल तयार गरेको छ।
२७ फाल्गुन २०७९, शनिबार २२:०० मा प्रकाशित
