पोखरा । पोखराको म्याराथनको खेलाडी दर्ता समय थप गरिएको छ । नेपाली अग्रज खेलाडीहरुको छाता संस्था नेपाल भूतपूर्व खेलाडी मञ्चले आयोजना गर्ने १७ औं पोखरा अन्तर्राष्ट्रिय म्याराथनको खेलाडी दर्ता समय थप गरेको हो ।
माघ २९ गते सम्म दर्ता मिति रहेकोमा आज बाट फागुन ३ गते सम्मका लागि थप गरिएको मञ्चका अध्यक्ष हरिप्रसाद पराजुलीले जानकारी दिएका छन् ।
विभिन्न जिल्लाका धावकहरु पोखरा म्याराथनमा आउन चाहना राखेकोले दर्ता समय थप गरिएको बताउँदै पोखरा म्याराथन अन्तर्गत हुने ७ वटा इभेन्टहरु एकै पटक एकै समयमा हुने बताए । उनले भने–“पोखराकै व्राण्डको रुपमा रहेको पोखरा अन्तर्राष्ट्रिय म्याराथनमा दर्ता गर्नेको संख्या दिन प्रतिदिन बढ्दै गएको छ । अध्यक्ष पराजुलीले भने पूर्व मेची देखि महाकाली सम्म सातै प्रदेशबाट धावकहरु आउन चाहेका छन् । हामीले सोही अनुरुप फागुन ३ गते सम्मका लागि समय थपेका छौं ।”
पोखरा म्याराथन नेपालकै जेठो म्याराथन हो भने सर्वाधिक पुरस्कार राशीको म्याराथन समेत हो । आयोजकले पुरस्कारका लागि मात्रै १७ लाख ५२ हजार खर्च गर्दैछ भने दौड पुरा गर्नेलाई फिनिशर मेडल समेत प्रदान गर्दैछ ।
पोखरा म्याराथनका लागि मञ्चले प्रचारात्मक अभियानलाई तिव्र पारेको छ ।
