पोखरा । पोखराको जनप्रिय बहुमुखी क्याम्पसले सहायक क्याम्पस प्रमुखमा मेखराज पौडेल र रमेशबहादुर खड्कालाई नियुक्त गर्दै शुक्रबार पदस्थापना गरेको छ ।
प्रमुख अतिथि तारा गिरी र सम्मानार्थ संरक्षक रामप्रसाद बस्ताकोटीले क्याम्पस प्रमुखद्वय पौडेल र खड्कालाई फूलमाला सहित नियुक्तिपत्र दिएर पदस्थापन गराएका थिए ।
पदस्थापन कार्यक्रमका प्रमुख अतिथि एवम् क्याम्पस व्यवस्थापन समितिका अध्यक्ष तारा गिरीले नवनियुक्त सहायक क्याम्पस प्रमखद्वयलाई शैक्षिक कार्यक्रम सुधारका लागि दत्तचित्तले लाग्न र क्याम्पसलाई सधैं केन्दमा राखेर यसको प्रशासनिक र प्राज्ञिक उन्नयनमा लाग्न आग्रह गरे ।
सम्मानार्थ संरक्षक तथा समितिका सदस्य रामप्रसाद बस्ताकोटीले शुभकामना मन्तव्य दिँदै क्याम्पसको हितमा काम गर्नेहरू कहिल्यै पछि नपर्ने बताए ।
पदभार ग्रहण गर्दै सहायक क्याम्पस प्रमुख मेखराज पौडेलले खस्कँदो नतिजालाई उकास्न विद्यार्थी उत्तीर्ण प्रतिशतलाई वृद्धि गर्दै न्युन सहभागिता रहेको आन्तरिक परीक्षालाई प्रभावकारी बनाउने प्रतिवद्धा जनाए । अर्थशास्त्रका एमफिल रमेशबहादुर खड्काले क्याम्पसको शैक्षिक तथा प्रशासनिक स्तरवृद्धिका लागि आफ्नो सक्रियता र सकारात्मक भूमिकालाई प्रभावकारी बनाउँदै बोलेर भन्दा पनि काम गरेर देखाउने प्रतिवद्धता व्यक्त गरेका छन्।
प्रतिक्रिया लेख्नुहोस्:-