पोखरा । पृथ्वीनारायण क्याम्पस नेपाली विभागले आफ्नै विभागमा आफ्नै पुस्तकालय सञ्चालनमा ल्याएको छ । भौतिक विकास मन्त्रालयको १० लाख रुपैया सहयोगका साथै विभागको आफ्नै मेहनत र लगानीमा संचालनमा आएको उक्त पुस्तकालयको एक कार्यक्रमका बीच भौतिक पूर्वाधार तथा शहरी विकासमन्त्री कुमार खड्काले पुस्तकालयको उद्घाटन गरेका हुन् ।
सो अवसरमा बोल्दै मन्त्री खड्काले विश्वमा अहिले कुनै पनि विषयको सूक्ष्मरुपमा अध्ययन, अनुसन्धान गर्ने परिपाटी रहेको र शैक्षिक उन्नयनका लागि नेपाली विभागले देखाएको गम्भीरताप्रति खुशी व्यक्त गरे । उनले प्राध्यापकहरुले शिक्षाको विकासमा ‘विभागीय प्रतिष्पर्धा’ गर्न आवश्यक रहेको समेत बताए ।
कार्यक्रमको सभापति एवं विभागीय प्रमुख प्रा.डा.कुसुमाकर न्यौपानेले विभागमा आएदेखि आफुले दिनरात गरेको मिहिनेत सार्थक भएकोमा खुशी व्यक्त गरे । विभागिय प्रमुख न्यौपानेले आफुले देखेको सपना पुरा गर्न सहयोग गर्ने सम्पूर्ण सहयोगीलाई आभार व्यक्त गरे ।
विदेशका विश्वविद्यालय भ्रमणका दौरान विभागीय पुस्तकालय देख्दा पिएनमा पनि यस्तै भइदिए भन्ने कल्पना गरेको बताउँदै आफु कार्यरत विभागमै इच्छाएको काम गर्न पाउँदा खुशी लागेको प्रमुख न्यौपानेको धारणा छ । उनले भने ‘यहाँ विभिन्न शोधार्थीले गरेका शोध र सम्बन्धित थेसिस पनि राखिएका छन्, अब अनुसन्धानमा लाग्ने विद्यार्थीले सन्दर्भ सामग्री खोज्न कतै भौतारिन पर्ने छैन ।’
पुस्तकालयमा करिब १० हजार शोधग्रन्थ र पुस्तक रहेका छन् । कार्यक्रममा पुस्तकालयलाई सहयोग गर्ने लायन्स क्लब, अलिमियाँ लोक वाङ्मय प्रतिष्ठानलगायतलाई सम्मान गरिएको थियो ।
