पोखरा । नेपालका प्रथम जननिर्वाचित प्रधानमंत्री, नेपाली कांग्रेसका संस्थापक एवं जननायक विश्वेश्वरप्रसाद कोईरालाको ४० औं स्मृति दिवसका अवसरमा रक्तदान कार्यक्रमको आयोजना हुने भएको छ ।
नेपाली कांग्रेस कास्कीको सहयोग, क्षेत्रीय समितिहरुको समन्वय र पोखरा महानगर समितिको आयोजनामा साउन ६ गते रक्तदान कार्यक्रम हुने भएको हो ।
रक्तदान जीवनदान भन्ने मुल मन्त्रका साथ कार्यक्रमको आयोजना गर्न लागिएको कार्यक्रम संयोजक एवम् नेपाली काँग्रेस पोखरा महानगरका कोषाध्यक्ष सम्मरबहादुर श्रेष्ठले जानकारी दिए ।
साउन ६ गते बिहान साढे ७ बजे देखि विपी चोक चिप्लेढुंगामा सुरु हुने उक्त रक्तदान कार्यक्रमको तयारी तिब्र रुपमा भईरहेको कार्यक्रम संयोजक श्रेष्ठले बताए ।
नेपाली काँग्रेस पोखरा महानगरका सभापति सुरेन्द्र विजुक्छेले कार्यक्रम सफल बनाउन पोखरा महानगरका कार्य समिति सदस्य तथा सबै वडा इकाईका सभापतिहरुलाई आग्रह गरेका छन् । रक्तदान सामाजिक कार्य भएकाले मात्र नभएर अस्पतालहरुमा रगतको अभाव भएको समयमा रक्तदान कार्यक्रममा रक्तदाताहरुको सहभागिता उल्लेखनीय हुने सभापति विजुक्छेको भनाई छ ।
