पोखरा । नेपाली कांग्रेस पोखरा महानगर समितिको शनिबार तय गरिएको पुर्ण बैठकमा समितिका सदस्यहरुको गणपुरक संख्या पुग्न सकेन ।
बैठकमा गणपुरक संख्या नपुगेको कारण बैठकले विभिन्न निर्णयहरु गर्न सकेन तर गत स्थानीय तहको निर्वाचन र आसन्न संसदीय निर्वाचनका बारेमा सहभागीहरु बिच केही समय समिक्षात्मक छलफल भएको थियो ।
पार्टीको पोखरा महानगर सभापति सुरेन्द्र बिजुक्छेको अध्यक्षतामा सम्पन्न उक्त कार्यक्रममा बोल्ने वक्ताहरुले स्थानीय तहको निर्वाचनमा गठबन्धन दलहरु मध्ये नेपाली कांग्रेसको तर्फबाट उपमेयर उमेदवार भएपनि विजय हुन नसकेकोमा दुख प्रकट गरेका थिए ।
कतिपयले भने ३३ वडा मध्ये २३ वडा कांग्रेसले जित्दा पनि उपमेयर हार्नुको पछाड़ी पार्टीको वडा समिति र विभिन्न भातृ एवं शुभेच्छुक संस्थाहरु राम्रोसंग परिचालन नहुनु पनि रहेको चर्चा गरेका थिए ।
आसन्न संसदीय निर्वाचनमा पनि नया अनुहार, आम नागरिकले आशा गर्ने व्यक्ति साथै नागरिकसंग प्रत्यक्ष वा अप्रत्यक्ष रुपमा नजिक भएका व्यक्तिहरु जसले अध्ययन संगै राम्रो कार्य क्षमता देखाउन सक्नेलाई उमेदवार बनाउनु पर्नेमा जोड़ दिए ।
बैठकमा अन्य बिभिन्न विषयमा छलफल गरिएको तर कोरम नपुगेको कारण कुनै पनि निर्णय नगरिएको बताईन्छ ।
बैठकको संचालन सचिव टुवराज बाँस्तोलाले गरेका थिए ।
