पोखरा । तांचोक नौजे पंगी लामा चेलीबेटी तथा आमा समुह बगर पोखराले आईतबारदेखि नेतृत्व विकास तथा उद्घोषण कार्यक्रम संचालन गरेको छ ।
परिवारका सदस्यहरुको बोल्ने कलाको विकासका लागि तालिमको आयोजना गरिएको अध्यक्ष देवीकुमारी गुरुङले जनाकारी दिईन् । समाजले आयोजना गर्ने कार्यक्रममा मन्तव्य राख्न र कार्यक्रम संचालन गर्न समस्या नहोस् भन्ने उद्देश्यले तालिमको आयोजना गर्न लागिएको अध्यक्ष गुरुङको भनाई छ ।
सिकाईलाई उमेरले नछेक्ने बताउँदै उनले समाजका हरेक समुहका महिला सदस्यहरुलाई तालिममा अनिवार्य उपस्थितिको वातावरण सिर्जना गरिएको समेत जानकारी दिईन् ।
समाजका सदस्य तथा कार्यक्रम संयोजक सीता गुरुङले समाजका आमा तथा चेलीबेटीहरुको क्षमता अभिवृद्धि गर्न र सार्वजनिक कार्यक्रमहरु व्यवस्थित रुपमा संचालन गर्न सक्षम बनाउने उद्देश्यले कार्यक्रमको आयोजना गरिएको बताईन् ।
महिला उद्यमी तथा राजनीतिकर्मी समेत रहेकी गुरुङले तांचोक नौजे पंगी लामा चेलीबेटी तथा आमा समुहका सदस्यहरुलाई रहेक क्षेत्रमा सवल र सक्षम बनाउने आफ्नो उद्देश्य रहेको बताउँदै अभ्यासले हरेकलाई सक्षम बनाउने बताईन् ।
संचारकर्मी रीता गुरुङ प्रशिक्षक रहेको उक्त तालिम शुक्रबारसम्म चल्नेछ ।संचारकर्मी गुरुडंसंग एक दशक भन्दा बढ़ी समय पोखरामा रहेर पत्रकारिता गरेको अनुभव छ । उनले गोल्डेन न्युज दैनिकको सम्पादक र सुनौलो एफ एमको स्टेशन म्यानेजर रहेर काम गर्नुको साथै पोखरा बहुमुखी क्याम्पसमा प्राध्यापन गरेकी थिईन ।
