पोखरा । कास्कीको मादी गाउँपालिकामा मंगलबार कार्यपालिका सदस्यका लागि निर्वाचन सम्पन्न भएको छ ।
सम्पन्न गाँउ कार्यपालिका सदस्यको निर्वाचनमा नेकपा एमालेबाट दलित तथा अल्पसंख्याक २ र महिलातर्फ ४ गरी ६ जना निर्वाचित भएका छन्। दलिततर्फ वीरबहादुर परियार र अल्पसंख्यकतर्फ बामदेव भुजेल निर्वाचित भएका हुन्। महिलातर्फ गंगादेवी सार्की, पूर्णसुवा गुरुङ, सिता परियार र लक्ष्मी गिरी चुनिएको निर्वाचन अधिकृतको कार्यालय मादीले जनाएको छ ।
कार्यपालिका सदस्यको चुनावकालागि ६२ मतदाता रहेको मादीमा नेकपा एमालेको ३३ र गठबन्धनको २७ मतदाता रहेका थिए । निर्वाचन अधिकृत दुर्गाप्रसाद भट्टराईले निर्वाचित कार्यपालिकाका सदस्यलाई प्रमाणपत्र वितरण गरेका थिए ।
गाउँपालिकाका अध्यक्ष देवीजंग गुरुङले कार्यपालिका सदस्यलाई सपथ ग्रहण गराए । योसँगै मादीको कार्यपालिकामा नेकपा एमालेको उपाध्यक्ष कल्पना गुरुङ सहित ११ र गठबन्धनको अध्यक्ष देवीजंग गुरुङ सहित गठबन्धनको ९ सदस्य छन् ।
गत ३० वैशाखमा भएको चुनावमा उपाध्यक्षसहित एमालेका ३३ र अध्यक्षसहित गठबन्धनका २९ जना निर्वाचित भएका थिए । मादी गाउँपालिका अध्यक्षमा कांग्रेसका देवीजंग गुरुङ र उपाध्यक्षमा एमालेकी कल्पना गुरुङ निर्वाचित भएका थिए ।
नेपालको संविधानअनुसार गाउँपालिकाको अध्यक्ष र उपाध्यक्ष गाउँ कार्यपालिकाको पदेन अध्यक्ष र उपाध्यक्ष हुन्छन् । त्यस्तै वडाअध्यक्ष स्वतः गाउँ कार्यपालिकाको सदस्य हुन्छन् । मादीमा १२ वडा छन् । त्यसमा ६ वटा कांग्रेस, ४ वटा एमालेले र २ वटा वडा नेकपा माओवादी केन्द्रले जितेको छ ।
निर्वाचित महिला वडा सदस्यबाट चार जना र सोही गाउँका दलित वा अल्पसङ्ख्यक सर्वसाधारणबाट दुई जना कार्यपालिकामा निर्वाचित हुने संविधानमा व्यवस्था छ । कार्यपालिकाका जनप्रतिनिधि छनोट गर्न निर्वाचित जनप्रतिनिधि नै मतदाता हुन्छन् ।
