पोखरा । पोखरा महानगरपालिका वडा नम्बर १४ का नवनिर्वाचित जनप्रतिनिधिहरुले वडाको प्रशासनिक भवन निर्माणका साथै वडाको प्रत्येक टोलमा सरसफाई कार्यक्रम संचालन गर्ने प्रतिबद्धता जनाएका छन् ।

नव निर्वाचित वडाध्यक्ष बोधबहादुर कार्कीसहित सदस्यले पदभार ग्रहण गर्दै सुत्केरी पोषण कार्यक्रम संचालन गर्ने, वडाको मुख्य सडक मर्मत सम्भार गर्ने, गरीव बस्ती, मुख्य चोक र वडा कार्यालयमा फ्रि वाइफाइको सेवा दिने प्रतिबद्धता पनि जनाएका छन् ।

पदभार ग्रहण गर्दै नवनिर्वाचित वडाध्यक्ष कार्कीले आफुले सरकारी सुविधा वापत प्राप्त रकमबाट विपन्न वर्गका बालबालिकालाई छात्रबृद्धि प्रदान गर्ने बताए । विश्वासका साथ आफ्नो टिमले प्राप्त गरेको जनमतलाई खेर जाने नदिने गरि आफ्नो टिम पूर्ण रुपमा जनताको काममा समर्पित रहने कार्कीले विश्वास दिलाए ।

पोखराको गौरवको रुपमा रहेको अन्तराष्ट्र्रिय विमानस्थलले वडा नं १४ को विकासमा सहयोग नगरेको भन्दै वडाध्यक्ष कार्कीले राष्ट्रिय गौरवको आयोजनाले वडावासीलाई दुखः दिएको र यहाँका जनताका समस्या नसुने विमानस्थलको तारबार तोड्न पनि पछि नपर्ने उनले चेतावनी पनि दिए ।

नवनिर्वाचित वडाध्यक्ष बोधबहादुर कार्कीसहित सदस्यहरु दिलमाया गुरुङ, कृष्णहरि काफ्ले ,तनुजा थापा सिके र गोपालप्रसाद सापकोटाले पदभार ग्रहण गरे।