पोखरा । पोखरा महानगरपालिका वडा नम्बर १० का नवनिर्वाचित जनप्रतिनिधिहरुले वडा भित्रका सामुदायिक विद्यालयहरुमा निशु्ल्क भर्ना अभियान संचालन गर्ने प्रतिबद्धता जनाएका छन् ।

नवनिर्वाचित वडाध्यक्ष राजेश गुरुङसहित सदस्यले पदभार ग्रहण गर्दै आफ्नो वडाभित्रको सामुदायिक विद्यालयमा निशुल्क भर्नासंगसंगै शुल्क तिर्न नसकेकै कारण कुनै पनि विद्यार्थीलाई परीक्षा दिनबाट बंचित नगरिने प्रतिबद्धता जनाएका हुन् । ‘शिक्षामा सबैको पहुँच पुगोस् भन्ने हाम्रो उद्देश्य हो’ नवनिर्वाचित अध्यक्ष गुरुङले भने ‘शुल्क तिर्न नसकेकै कारण अब वडाभित्रका विद्यार्थी कसैले पनि पढ्न र परीक्षा दिनबाट बंचित हुनु पर्दैन ।’

वडासचिव हरीकृष्ण कार्कीको नेतृत्वमा वडाका कर्मचारीहरुले नवनिर्वाचित जनप्रतिनिधिहरुलाई कार्यालयमा स्वागत गरेका थिए । नवनिर्वाचित वडाध्यक्ष गुरुङले पारदर्शी ढंगले सेवाग्राहीलाई छिटो र छरितो सेवा दिन कर्मचारीहरुलाई निर्देशन दिएका थिए ।

नवनिर्वाचित वडाध्यक्ष राजेश गुरुङसहित सदस्यहरु नरदेवी गुरुङ, सुनीमाया सार्की, परमेश्वरबहादुर कार्की र पूर्णचन्द्र न्यौपानले विहीबार पदभार ग्रहण गरे।