पोखरा, ६ जेठ । पोखरा महानगरपालिका वडा नम्बर ८ को वडाध्यक्षमा नेकपा एमालेका उम्मेदवार रुद्रनाथ बराल प्यानल सहित विजयी भएका छन् । बराल यस अगाडी पनि सोही वडाको वडाध्यक्ष थिए । उनले २ हजार सय मत प्राप्त गरेका थिए । बरालको निकटतम प्रतिद्वन्द्वी रहेकी नेपाली कांग्रेसकी शारदा गिरीले १ हजार ५ सय २५ मत मात्र प्राप्त गरेकी थिईन् ।
गिरी र बराल दुबै जना यस अगाडी २०७४ को निर्वाचनमा पनि वडाध्यक्ष पदमा प्रतिस्पर्धा गरेका थिए, त्यस बेला पनि बरालले गिरिलाई पराजित गरेका थिए ।

नेकपा एमालेको तर्फबाट मेयर पदका उम्मेदवार कृष्ण थापालाई १ हजार ६३९ मत र उपमेयरका उम्मेदवार मन्जुदेवी गुरुङलाई १ हजार ९ सय ७५ मत परेको त्यस वडामा वडाध्यक्षका उम्मेदवार बराललाई भने मेयर थापाको भन्दा ५०१ मत बढ़ी तथा उपमेयर गुरुङको भन्दा १ सय ५६ मत बढ़ी परेको छ । यसरी हेर्दा वडाध्यक्ष बराललाई एमाले समर्थित कार्यकर्ता भन्दा बाहिरबाट समेत मत आएको देखिन्छ । त्यस वडामा नेपाली कांग्रेसका धेरै नेताहरु समेत रहेकोले कांग्रेस उम्मेदवार गिरीको पराजयले विभिन्न प्रश्नहरु उब्जिएको बताईन्छ ।

खुल्ला सदस्यमा गोविन्द बराल र हिराकाजी श्रेष्ठ, महिला सदस्यमा पवित्रा पौडेल र दलित महिला सदस्यमा लक्ष्मी विक विजयी भएका छन् । उनीहरु सबै नेकपा एमालेको तर्फबाट उम्मेदवार बनेका हुन् ।