पोखरा । स्थानीय निर्वाचनको समय नजिकिदै गर्दा पोखरा महानगरपालिका वडा नं ९ का उम्मेदवारहरुले घरदैलो कार्यक्रमलाई जारी राखेका छन । उम्मेदवारहरु पार्टीको चुनावी घोषणा पत्र लिएर मतदाता समक्ष पुगीरहेका छन् । घरदैलो अभियानका क्रममा उम्मेदवारहरुले मतदाता समक्ष पार्टीको र आफ्नो उम्मेदवारीको बारेमा स्पष्ट पार्नुका साथै मतदाताको समस्या र टोलको विकासको बारेमा पनि भलाकुसारी गरिरहेका छन् ।

यसैक्रममा नेपाली कांग्रेसको तर्फबाट वडा नं ९ को वडाध्यक्ष र वडासदस्य पदका उमेदवारहरुले मंगलबार चुनावी अभियान अन्तर्गत पोखरा बसपार्क एरियामा घरदैलो कार्यक्रम सम्पन्न गरेका छन । पोखरा बसपार्क क्षेत्रमा गरिएको घरदैलो कार्यक्रममा मतदाता तथा कार्यकर्ताको उत्साहजनक सहभागिताका साथै सहयोग र साथ रहेको उम्मेदवारहरु बताउँछन् ।

वर्षौदेखि बन्न नसकेको पोखरा बसपार्क निर्माण गर्ने र सुल्झिन नसकेको सुकुम्बासी समस्या समाधान गर्ने मुल एजेण्डा भएको विश्वास दिलाउँदै मर्सानी नेतृत्वको प्यानलले मंगलबार बसपार्क क्षेत्रमा घरदैलो अभियान गरेको हो । ।

‘म जे बोल्छु त्यो गर्छु र वडाको विकासकालागि त एजेण्डा र प्रतिबद्धता दुवै साथ छ’ वडा नं ९ का अध्यक्ष पदका उम्मेदवार मर्सानीले भने । टोल टोलमा मतदाता हरु भेटघाट गरि मर्सानी नेतृत्वको प्यानलले आफ्ना एजेण्डा र प्रतिबद्धता सार्वजनिक गर्नुका साथै उनिहरुलाई विश्वास दिलाउने प्रयास गर्दै आएको छ ।

‘हरेक टोलका मतदाताको समस्या उनीहरुकै मुखबाट सुन्नु हाम्रो पहिलो प्राथमिकता हो’ खुल्ला सदस्यका उम्मेदवार भावना श्रेष्ठले भनिन् ‘निर्वाचनको नतिजासंगसंगै हामी सेवाका लागि जनता माझ पुग्ने छौं ।’ घरदैलो अभियानमा वडा सदस्यका उम्मेदवारहरु भावना श्रेष्ठ, गीता चर्मकार, लक्ष्मी पहारी र नन्दराम गिरी पनि मतदातासंग भेटघाटमा जुटेका छन् ।