पोखरा, पोखरा महानगरपालिका ८ को वडाध्यक्षकी उम्मेद्वार शारदा गिरीले अघिल्लो नेतृत्वले गर्न नसकेका कामहरु पुरा गर्न गठबन्धनलाई भोट दिन आग्रह गरेकी छिन् ।
सोमबार घरदैलो कार्यक्रममा नेपाली कांग्रेसबाट वडाध्यक्ष पदकी उम्मेद्वार बनेकी गिरीले २०७४ सालमा नेकपा एमालेको नेतृत्वले पोखरा महानगरमा धेरै काम अपुरो राखेकाले ती काम पुरा गर्न गठबन्धन आवश्यक रहेको बताइन् ।
महिला, वालवालिका, युवा, जेष्ठ नागरिक, दलित लक्षित कामहरु अझै गर्न बाँकी रहेकाले त्यसमा नयाँ योजनाका साथ अघि बढ्नका लागि आफूहरुको नेतृत्वको खाँचो रहेको उनको भनाइ थियो । पोखरा महानगरमा मेयर र उपमेयरमा गठबन्धनबाट धनराज आचार्य र कोपिला रानाभाट चुनावी मैदानमा छन् ।
पोखरा महानगर ८ मा पनि वडाध्यक्षमा शारदा गिरीसहित गठबन्धन नै अघि बढेको छ । जसमा महिला सदस्य देवीमाया चालिसे, दलित महिला सदस्य माया नेपाली, खुल्लाबाट कृष्णप्रसाद श्रेष्ठ र गठबन्धनबाट दामोदर सिग्देल रहेका छन् ।
