पोखरा, नेपाली लेखक सङ्घ कास्कीले हरेक वर्ष प्रदान गर्ने गण्डकी प्रदेशस्तरीय ‘लेखक कृति पुरस्कार–२०७८’ साहित्यकार दीपक समीपद्वारा लिखित मुक्तक सङ्ग्रह ‘अक्षर अक्षरमा देश’ कृतिलाई प्रदान गरिने भएको छ ।

नेपाली लेखक सङ्घ कास्कीको सोमबार बसेको कार्यसमिति बैठकले पुरस्कार छनोट समितिद्वारा गरिएको निर्णयलाई अनुमोदन गर्दै उक्त कृतिलाई पुरस्कृत गर्ने निर्णय गरेको संस्थाका सहसचिव प्राञ्जलले जानकारी दिए ।

डा. ईश्वरमणि अधिकारीको संयोजकत्वमा गठित पुरस्कार छनोट समितिले २०७८ सालमा गण्डकी प्रदेशभित्रका लेखकहरूबाट प्रकाशित कृतिहरूमध्येबाट उक्त कृतिलाई पुरस्कारका निम्ति छनोट गरेको हो ।

०७८ सालमा प्रकाशित कृतिहरू सङ्कलन गरी कार्तिक २७ गते बसेको कार्यसमिति बैठकले उत्कृष्ट ७ कृति छनोट गरी अन्तिम निर्णयका लागि पुरस्कार छनोट समितिसमक्ष सिफारिस गरेको थियो । साथै पुरस्कार छनोट समितिले कृतिहरूको विस्तृत अध्ययन गरी मङ्सिर २९ गते बसेको बैठकबाट समीपको कृतिलाई पुरस्कारका लागि छनोट गर्ने निर्णय गरिएको थियो । डा. ईश्वरमणि अधिकारीको संयोजकत्वमा गठित पुरस्कार छनोट समितिका सदस्यहरूमा डा. भूमिराज बस्ताकोटी, ईशा शाह, संस्थाका अध्यक्ष सञ्जीव पौडेल र सचिव कमल पौडेल ‘अथक’ रहेका थिए ।

गणेश शर्माको अध्यक्षतामा रहेको कार्यसमितिले २०७५ सालमा स्थापना गरेको सो पुरस्कारको राशि रु. २५००० रहेको छ ।

चालीसको दशकको उत्तरार्धबाट नेपाली साहित्य साधनामा निरन्तर क्रियाशील समीपको यो दोस्रो प्रकाशित कृति हो ।यसअगाडि उनको ‘भूगोलभित्र नकोरिएको देश’ गजलसङ्ग्रह २०६२ सालमा प्रकाशित भएको थियो । उक्त कृतिले पनि सुदूर पश्चिमाञ्चल गजल मञ्चले प्रदान गर्ने गजल साधना सम्मान–२०६३ बाट पुरस्कृत भएको थियो । यसबाहेक विभिन्न पत्रपत्रिकामा उनका रचनाहरू पचासको दशकबाटै निरन्तर प्रकाशित हुँदै आइरहेका छन् ।

विशेषगरी गीत, गजल, मुक्तक, कविता र आख्यान लेखनमा सक्रिय उनी पोखरेली युवा सांस्कृतिक परिवारका पूर्व अध्यक्षसमेत हुन् । थुप्रै साहित्यिक एवम् सामाजिक संघसंस्थामा सफलतापूर्वक नेतृत्वदायी भूमिका निर्वाह गरिसकेका उनी पोखरेली साहित्यिक वृत्तमा अत्यन्तै सक्रिय छन् ।