पोखरा । फेवाताल किनारको सेदीबगरबाट सराङकोटसम्म संचालनमा ल्याएको अन्नर्पूण केवलकार प्रा. लि.ले आफ्नो प्रचार प्रसार अभियानलाई तिब्र पारेको छ ।
गण्डकी प्रदेशको राजधानी पोखरा महानगरपालिका वडा नं १८ क्षेत्रमा वैकल्पिक यात्राको रुपमा संचालनमा ल्याएको केवलकारले सर्वसाधारण समक्ष सेवा संचालनमा ल्याएको जानकारी दिन प्रचारप्रसार अभियानलाई तिब्र पारेको हो ।
यसैक्रममा आईतबार पोखरा महानगरपालिकाभित्र गुड्ने सिटी बसमा आफ्नो लोगो सहितको व्यानर टास्ने काम सम्पन्न गरेको छ । ‘पोखरा महानगरपालिकाभित्र गुड्ने ५० वटा सिटी बसमा व्यानर टास्ने काम सम्पन्न गर्यौं’ महाप्रबन्धक दिनेश पौड्यालले भने ‘केवलकार संचालनमा आईसकेको जानकारी सर्वसाधारण समक्ष पुर्याउन पनि प्रचारप्रसार गरेका हौ ।’
केवलकारबाट आन्तरिक तथा बाह्य पर्यटकहरुले फेवाताल तथा सराङकोटमा बिहान उदाउदो सुर्योदय तथा सुयास्तको दर्शन गर्न पाउनुका साथै अन्नर्पूण, माछापुच्छ्रे, गणेश तथा धवलागिरी हिमालको दृश्यावलोकन गर्न सकिने महाप्रबन्धक पौड्यालले गुरुकुल खबरलाई जानकारी दिए ।
गत फागुन ६ गतेबाट नै सञ्चालनमा आएको अन्नपूर्ण केबलकारको दुरी सेदीबगरदेखि सराङकोटसम्म दुई हजार ४०० मिटर रहेको छ भने सेदीबगरदेखि सराङकोटसम्म लामो समय लाग्ने सडक यात्रालाई केवल नौ देखि १०मिनेट भित्रमा नै पार गर्न सकिने बनाएको छ । १७ वटा गोन्डोला रहेको र एउटा गोन्डोलामा आठ जना सम्म बसेर सयर गर्न सकिनुका साथै एक घण्टामा ५ सय जनासम्मले यात्रा गर्न सकिने बताईएको छ ।
कम्पनीले नेपालीका लागि रु ७ सय, सार्क राष्ट्रका पर्यटकका लागि रु ८ सय र तेस्रो मुलुकका नागरिकका लागि नौ डलर भाडादर तय गरेको छ । ज्येष्ठ नागरिक र अपाङ्गता भएका व्यक्तिका लागि भने भाडामा ५० प्रतिशत छुटको व्यवस्था गरेको छ । यसैगरी विधार्थीका लागि २५ प्रतिशत सहुलियतका साथै सहकारीबाट भमणमा आउने सदस्यहरुलाई १० प्रतिशत छुटको व्यवस्था गरेको कम्पनीले जनाएको छ ।
