बैठकमा सहभागी गण्डकी प्रदेशका  प्रदेश प्रमुख सचिव डण्डुराज घिमिरे, , कास्कीका प्रमुख जिल्ला अधिकारी रुद्रादेवी शर्मा, मुख्य निर्वाचन अधिकृत हिमलाल बेलबासे र प्रदेश निर्वाचन अधिकारी नारायण ढकालले निर्वाचनको प्राविधिक तथा सुरक्षा पक्षबारे प्रधानमन्त्रीलाई अवगत गराएका थिए । यसैगरी प्रदेशस्तरीय सुरक्षा निकायका प्रमुखहरू पृतनापति उपरथी भोला थापा, नेपाल प्रहरीका डीआईजी दीपेन्द्र जीसी, सशस्त्र प्रहरीका डीआईजी दीपेन्द्र शाह लगायतले निर्बाचन सुरक्षा र तयारीको बारेमा जानकारी गराएको श्रोतले जानकारी दिएको छ।

निर्वाचनलाई भयरहित र निष्पक्ष वातावरणमा सम्पन्न गर्न चालिएका कदमबारे सुरक्षा निकायका प्रमुखहरूले जानकारी गराएका  थिए । प्रमुख सचिव र पृतनापतिले निर्वाचन तयारी, सुरक्षा व्यवस्थापन, मतदान स्थल, मौसमी चुनौती तथा आकस्मिक योजनासम्बन्धी प्रस्तुतीकरण गरेका थिए । त्यसपछि विभिन्न निकायका प्रमुखहरूले आफ्नो धारणा राख्नुको साथै निर्बाचनको तयारीबारेमा जानकारी गराएका थिए।

पोखरा विश्वविद्यालयको २१औँ दीक्षान्त समारोहमा सहभागी हुन पोखरा पुगेकी प्रधानमन्त्रीले सोही अवसरमा प्रदेशको शान्ति सुरक्षा र निर्वाचन लक्षित तयारीबारे विस्तृत जानकारी लिएकी हुन् । प्रदेश प्रमुख सचिव घिमिरेका अनुसार प्रदेशमा क्रियाशील सुरक्षा संयन्त्रसहितको निर्वाचन सेलले गरिरहेका गतिविधि र हालसम्मको कार्यप्रगतिको प्रधानमन्त्रीले जानकारी लिएकी छन ।

उक्त अवसरमा प्रधानमन्त्रीले निर्वाचनलाई सुरक्षित बनाउन कुनै कसर बाँकी नराख्न निर्देशन दिँदै आवश्यक सुरक्षा रणनीतिबारे मार्गनिर्देशन समेत गरेकी थिइन्। निर्वाचन नजिकिँदै गर्दा सुरक्षा संवेदनशीलतालाई मध्यनजर गर्दै प्रदेशका सबै जिल्लामा उच्च सतर्कता अपनाउन र निर्वाचन सेललाई थप सक्रिय बनाउन उनले जोड दिएकी छन् ।