पोखरा, गण्डकी प्रदेशमा स्थापना गरिएको प्रदेश प्रेस रजिष्ट्रार कार्यालयको गण्डकी प्रदेशका मुख्यमन्त्री सुरेन्द्र राज पाण्डेले सोमबार उद्घाटन गरेका छन त्यस अबसरमा बोल्दै उनले लोकतन्त्रको मेरुदण्ड स्वतन्त्र प्रेस भएको उल्लेख गरे ।

पत्रकारितामा कानुनी स्पष्टता, अभिलेख व्यवस्थापन र पारदर्शिता अभिवृद्धि गर्न उक्त कार्यालयले काम गर्ने विश्वास ब्यक्त गर्दै उनले सञ्चार माध्यमहरूलाई व्यवस्थित गर्दै पत्रकार र सञ्चार संस्थाबीचको आपसी विश्वासलाई मजबुत पार्ने बिश्वास पनि ब्यक्त गरे ।

गण्डकी प्रदेश सरकारका प्रमुख सचिव डा. खगेन्द्रप्रसाद सुवेदीले सञ्चार स्वतन्त्रताको संरक्षण र जिम्मेवार पत्रकारिताको विकासमा प्रेस रजिष्ट्रारको कार्यालय महत्वपूर्ण बन्ने भन्दै प्रदेश सरकारले आवश्यक नीति, संरचना र स्रोतसाधनका माध्यमबाट सहयोग गर्ने बताए ।

प्रेस रजिष्ट्रार विमला भण्डारीले कार्यालयको उद्देश्य, कानुनी अधिकार र कार्यक्षेत्रबारेजानकारी गराउंदै केवल दर्ता र नवीकरणको निकाय मात्र नभई पत्रकारिता क्षेत्रमा पारदर्शिता, उत्तरदायित्व र पेशागत मर्यादा कायम गर्ने संस्था हुने बताइन ।

गण्डकी प्रदेश सरकारले तयार पारेको आमसञ्चार विधेयकमा अनलाइन पत्रिका दर्ता तथा नविकरणसम्बन्धी स्पष्ट प्रावधानहरु समेटिएको र प्रेस रजिष्ट्रारको कार्यालयबाट नै उक्त कार्य गर्न पहल गर्ने उनले बताइन ।

कार्यक्रममा प्रेस काउन्सिल नेपालका सदस्य केशव शरण लामिछाने र नेपाल पत्रकार महासंघ गण्डकी प्रदेशका अध्यक्ष रमेश पौडेल लगायतले बोलेका थिए ।