‘धेरै एक्सपेन्सिभ भयो राज्य प्रणाली । नेपाली जनताले यति ज्यादा महँगो शासन प्रणाली व्यहोर्न सक्दैनन्,’ पूर्वपरराष्ट्रमन्त्री साउदले भने, ‘शासन प्रणालीमा जति साधारण खर्च बढ्छ, त्यति विकासका सम्भावना कम हुन्छन् । किनभने विकास खर्च त्यति घट्छ ।’ उनले संविधान संशोधन गरेर शासन प्रणालीमा हुने खर्च घटाउने विषयतर्फ ध्यान दिनुपर्नेमा जोड दिए ।

नेता साउदले सरकार  खाली जुहारीमा मात्रै केन्द्रित भएको पनि टिप्पणी गरे । सरकार कहिले शिक्षकलाई, कहिले कर्मचारीलाई जवाफ दिने काममा केन्द्रित भएको आरोप लगाउंदै उनले यस्तो प्रवृतिका कारण सरकारले प्राथमिक दायित्व निर्वाह गर्न समेत नसक्ने बताए ।

‘संविधानमा आबश्यक परिमार्जन गर्ने तिर दुईतिहाइको सरकारको ध्यान जाला भनेर हामीले सोचेका थियौँ । तर, सरकार खाली जुहारीमा मात्रै केन्द्रित भएको देखिन्छ,’ उनले भने, ‘काममा जानुपर्ने सरकार, जनतालाई राहत दिनुपर्ने सरकार कहिले शिक्षकलाई, कहिले कर्मचारीलाई जवाफ दिने काममा मात्रै गयो भने आफ्नो प्राथमिक दायित्व निर्वाह गर्न सक्दैन ।’

संसद्‍‌भित्र र बाहिर आफूहरू सरकारको बचाउमा लागिरहेको भन्दै उनले अहिलेको वस्तुस्थितिलाई पार्टीभित्र पनि छलफलको विषय वस्तु बनाउनुपर्छ भन्ने मान्यता राखेर मात्रै सरकारका कमीकमजोरीबारे बोल्ने गरेको बताए ।

कार्यक्रममा नेपाली काँग्रेसका केन्द्रीय सदस्य गुरु बराल, केन्द्रीय सदस्य शारदा पौडेल, कांग्रेस नेताहरु गुरुराज घिमिरे, गोबिन्द बहादुर शाह, पूर्व मन्त्री कुमार खड्का, नेका महासमिति सदस्यहरु शोभियत बहादुर अधिकारी, देबराज चालिसे र रंगिला आचार्य, वडाध्यक्ष प्रेमप्रसाद कर्माचार्य, प्रदेश सभापति दिनेश आचार्य र दिपेन्द्र मर्सानी, सचिब देबकृष्ण पराजुली लगायतले आआफ्नो भनाई राखेका थिए। कार्यक्रमको सभापतित्व कास्की क्षेत्र न.२ का सभापति केशर प्रसाद निर्दोषीले गरेका थिए ।