पोखरा, गण्डकी प्रदेश सरकारका सामाजिक विकास, युवा तथा खेलकुद मन्त्री विन्दुकुमार थापाले राज्यबाट प्रदेशको सभासदको हैसियतमा राज्यबाट प्राप्त सेवा–सुविधा स्थानीय जनता र समुदायको हितमा खर्च गर्दै आएको जनाएका छन । कास्की निर्बाचन क्षेत्र न. २ ख मा नेपाली काँग्रेसबाट निर्बाचित प्रदेश सांसद थापाले बिगतका बर्षहरुमा जस्तै २०८० फागुन देखि हालसम्म  बैठक भत्ता एबम पारिश्रमिक गरि बैंक खातामा जम्मा भएको ९ लाख ९० हजार ९४ रुपैयामा केहि रकम थप गरि १० लाख १ हजार २ सय २४ रुपैया आफ्नो क्षेत्रका जनताको माग अनुसार विभिन्न रचनात्मक काममा खर्च गरेको जनाएका छन।

मंगलबार नेपाल प्रेस युनियन कास्कीले आयोजना गरेको पत्रकार सम्मेलनमा मन्त्री थापाले आफ्नो पहिलो कार्यकालदेखि नै सेवा–सुविधाको रकम स्थानीय जनताका आवश्यकताअनुसार रचनात्मक कार्यमा लगाउँदै आएको उल्लेख गरे ।उनले जनताको प्रतिनिधि भएपछि तिनको आवश्यकतालाई सम्बोधन गर्नु मेरो कर्तव्य हो। मैले पाएको सेवा–सुविधा बापतको रकम सामाजिक कार्यमा खर्च गर्दै आएको छु”, मन्त्री थापाले भने।

मन्त्री थापाले प्रदेश सभाको पहिलो कार्यकालमा प्रदेश नामाकरण गर्ने बिशेष समितिको संयोजक भएर प्रदेश नामकरण सर्बसम्मत रुपमा  गरेको, कानुन संचार तथा प्रदेश सभा मामिला मन्त्रालयको जिम्मेवारी लिएर संघियताको कार्यान्वयनको लागि विभिन्न कानुनहरु बनाएको र प्रदेश सभाको दोश्रो कार्यकालमा सामाजिक बिकास, युवा तथा खेलकुद मन्त्रालयको जिम्मा लिएर जनतासंग प्रत्यक्ष जोडिने काम गर्दै आएको जानकारी समेत त्यस अबसरमा गराए ।

सामाजिक विकास, युवा तथा खेलकुद मन्त्रालयको मन्त्रीको हैसियतमा आफ्नो कार्यकालमा ‘फ्राइडे फर फ्युचर’, ‘सिक्दै कमाउँदै’, योग तथा ध्यान कार्यक्रम ‘गण्डकी स्वजागरण’, प्राविधिक शिक्षाको पूर्वाधार निर्माण, महिला तथा युवा सशक्तिकरणको क्षेत्रमा विभिन्न कामहरु भैरहेको  जानकारी दिंदै उनले भाषा आयोगको सिफारिसमा मगर र गुरुङ भाषालाई  गण्डकी प्रदेशको कामकाजी भाषा बनाउने विधेयक सदनमा छलफलको क्रममा रहेको समेत उल्लेख गरे। अपाङ्ग भएका व्यक्तिको अधिकार सम्बन्धी विधेयक पहिलो पटक गण्डकी प्रदेश सभाले अगाडी बढाएको, दलित अधिकार तथा सशक्तिकरण विधेयक पनि सैद्धान्तिक छलफलपछि विषयगत समितिमा गइसकेको उनले बताए । विधेयकले कानूनी रुप लिएपछि त्यसले गण्डकी प्रदेश सरकारलाई काम गर्न अझ सहज बनाउने मन्त्री थापाको विश्वास छ ।

पत्रकार सम्मेलनमा मन्त्री थापाले २०८०फागुन देखि माघ सम्म आफ्नो बैंक खातामा जम्मा भएको रकममा थप गरि १० लाख १ हजार ३ सय २४ रुपैया बिकास निर्माण र सामाजिक काममा खर्च गरेको समेत उल्लेख गरे  २०७४ सालदेखि हालसम्म प्रदेशसभा सचिवालय र मन्त्रालयबाट प्राप्त विभिन्न भत्ता, पारिश्रमिक र सुविधा बापत जम्मा ५८ लाख ५८ हजार ५ सय ४३ रुपैयाँ प्राप्त गरेका छन् । यसै अवधिमा उनले सामाजिक कार्यमा ७९ लाख ४२ हजार ३ सय ९० रुपैयाँ खर्च गरेका छन् । उनले सेवा–सुविधाबाट प्राप्त रकम शिक्षाका लागि छात्रवृत्ति, स्वास्थ्य क्षेत्रमा आधारभूत पूर्वाधार निर्माण, खेलकुद प्रवद्र्धन, महिला तथा युवाहरूको सशक्तिकरण, विपन्न परिवारलाई आर्थिक सहयोग जस्ता कार्यमा लगाएको बताए।

मन्त्रीको थापाको बैंकको खातामा २०७४ सालमा निर्वाचित भएको पहिलो वर्षदेखि हालसम्म क्रमशः ७ लाख ९ हजार १ सय ३५ रुपैयाँ, ६ लाख १० हजार ६ सय ३९ रुपैयाँ १० पैसा, ८ लाख ५९ हजार ८ सय ६८ रुपैयाँ, १३ लाख ६६ हजार ३ सय ६० रुपैयाँ २९ पैसा, ५ लाख २५ हजार २ सय ४७ रुपैयाँ, ८ लाख ९६ हजार, ९ लाख ९० हजार ९४ रुपौयाँ गरि जम्मा ५८ लाख ५८ हजार ५ सय ४३ रुपैयाँ जम्मा भएको छ । यसै अवधिमा मन्त्री थापाले सामाजिक कार्यमा पहिलो वर्षदेखि हालसमम्म क्रमशः १० लाख ५४ हजार ६ सय ५५, ९ लाख ३ हजार ७ सय १ रुपैयाँ ५२ पैसा, १२ लाख ४७ हजार ४० रुपैयाँ, १४ लाख ८६ हजार ९ सय ७० रुपैयाँ, ११ लाख ३६ हजार ७ सय रुपैयाँ, ११ लाख १२ हजार रुपैयाँ, १० लाख १ हजार ३२४ रुपैयाँ गरि जम्मा ७९ लाख ४२ हजार ३ सय ९० रुपैयाँ खर्च गरेका छन् ।

प्रदेश सरकारलाई अझ प्रभावकारी बनाउन संघीय सरकारले आवश्यक कानूनी व्यवस्थासहित आत्मनिर्भर बनाउने पहल गर्नुपर्नेमा जोड दिंदै उनले सिंहदरबारको ढिलासुस्तीले योजना कार्यान्वयनमा समस्या देखिएको दाबि गरे  । मन्त्री थापाले नेपाली कांग्रेसले लोकतन्त्र र संविधान स्थापनामा खेलेको भूमिकाको स्मरण गर्दै सरकारको पारदर्शिता र सुशासनलाई पहिलो प्राथमिकता दिने समेत उल्लेख गरे। “हामी सस्तो प्रचारबाजीबाट टाढा रहन्छौँ, काम गरेर जनताको मन जित्न चाहन्छौँ”, उनले भने। गण्डकी प्रदेश सरकारले आगामी दिनमा सुशासन, समृद्धि, रोजगारी सिर्जना र सेवा प्रवाहमा सुधार गर्ने प्रतिबद्धताका साथ काम गरिरहेको उनले स्पष्ट पारे । पत्रकार सम्मेलनको सभापतित्व नेपाल प्रेस युनियनका कास्की जिल्ला अध्यक्ष बासुदेव मिश्रले गरेका थिए ।