पोखरा, पोखरा भ्रमण वर्ष- २०२५ को उद्घाटन समारोहमा हाइड्रोजन ग्यास भरिएका बलुन विस्फोट भएको घटनामा प्रहरीले भारतीय नागरिक ४१ वर्षीय कमलेस कुमारलाई पक्राउ गरी आबश्यक अनुसन्धान अगाडी बढाएको जनाएको छ।
गृहमन्त्री रमेश लेखकले कास्कीका प्रमुख जिल्ला अधिकारी भरतमणि पाण्डेको संयोजकत्वमा उक्त घटनाको छानबिन गर्न समिति गठन गरि १५ दिनभित्र गृह मन्त्रालयमा प्रतिवेदन पेस गर्ने निर्देशन दिए लगत्तै उनीमाथि अनुसन्धान शुरु गरिएको बुझिएको छ।
फागुन ३ गते पोखरा भ्रमण बर्षको उद्घाटन समारोहमा हाइड्रोजन भरिएको बेलुनमा भ्रमण बर्ष कार्यक्रमको लोगो सहितको ब्यानर टाँसेर उडाउन खोज्दा स्पार्किङ मेसिनबाट निस्किएको झिल्काले आगलागी भई बलुन विस्फोट भएको थियो।
उक्त घटनामा पोखराका मेयर धनराज आचार्य र नेपाल सरकारका अर्थ मन्त्री बिष्णु पौडेल घाइते भएको थिए काठमाडौँको किर्तिपुर स्थित बर्न अस्पतालमा लगेर दुबैजनाको उपचार गरिएकोमा अर्थमन्त्री पौडेलले उपचारपछि सोमबार कीर्तिपुर अस्पतालबाट डिस्चार्ज पाएका छन् भने मेयर आचार्यको अझै केही दिन अस्पतालमै उपचार जारी रहने चिकित्सकहरूले बताएका छन्।
कास्की प्रहरीका सूचना अधिकारी डिएसपी वसन्त शर्माले बिस्फोटको घटनामा संलग्न ठानिएका केही व्यक्तिसँग प्रहरीले बयान लिइरहेको जानकारी दिए। उनका अनुसार पक्राउ परेका कमलेससँग हाइड्रोजन उत्पादन, भण्डारण र बलुन भर्ने प्रक्रियाबारे जानकारी संकलन भइरहेको छ, साथै कानुनी दायरामा ल्याउन आवश्यक कारबाही प्रक्रिया अघि बढाइँदैछ।
