पोखरा,मन्टेश्वरी एसोसिएसन कास्कीको आयोजनामा शनिबारदखि पोखरामा अभिभावक शिक्षा कार्यक्रम सम्बन्धि तालिम कार्यक्रम आयोजना गरिएको छ। तिन दिनसम्म चल्ने तालिममा पोखरामा संचालनमा रहेका विभिन्न मन्टेश्वरी स्कुलका ४५ जना संचालक तथा प्रिन्सिपलहरुको सहभागिता रहेको छ ।
भर्खर बिध्यालय जाने उमेरका बालबालिकाहरुलाई ब्यबहारिक रुपमा शिक्षा दिने प्रि प्राइमरी स्कुलहरुलाई नै मन्टेश्वरी भन्ने गरिएको छ। पोखरा र कास्की जिल्ला भित्र करिब ८० वटा मन्टेश्वोरी संचालनमा रहेपनि मन्टेश्वरी एसोसिएसन कास्कीमा भने करिब ५० वटा मात्र आबद्ध रहेको छन् । मन्टेश्वरी स्कुलको शिक्षालाई प्रभावकारी र गुणस्तरीय बनाउनकोलागि तिन दिने तालिमको आयोजना गरिएको हो ।
एसोसिएसनको कास्की जिल्ला अध्यक्ष भवानी अधिकारीले गुरुकुल खबरलाई दिएको जानकारी अनुसार कास्की जिल्लाभित्र संचालित मन्टेश्वरीहरुमा २ देखि ८ वर्षसम्मका करिब ६० हजार बालबालिका अध्ययनरत रहेको र तिनमा करिब ८ सय जनाले शिक्षक वा कर्मचारीको रुपमा रोजगारी पाएको छन् ।
तालिम कार्यक्रमको उद्घाटन गर्दै पोखरा महानगरपालिकाका प्रमुख धनराज आचार्यले बालबालिकाको मनोविज्ञान बुझेर सोहि अनुरुपको शिक्षा दिनसके राम्रो हुने बताए। उनले मन्टेश्वरी स्कुलको पूर्वाधार बालबालिका मैत्री हुनुपर्ने र सिकाई पद्दति पनि ब्यबहारिक हुनुपर्नेमा जोड दिए।
कतिपय स्कुलहरु एसोसिएसनमा आबद्द नरहेको कुराप्रति लक्षित गर्दै मेयर आचार्यले सबै स्कुललाई एकै संस्थामा आबद्द गराउने बाताबरण तयार गर्न आफु पनि लाग्ने स्पष्ट पारे । मेयर आचार्यले प्रीप्राइमरी स्कुलमा मात्रीभाषा सिकाउन आबश्यक रहेको कुरामा पनि जोड दिए ।
तालिमको उद्घाटन समारोहको अध्यक्षता मन्टेश्वरी एसोसिएसन कास्कीकी अध्यक्ष भवानी अधिकारीले गरेकी थिईन । उनले आफ्नो दुइ बर्षे कार्यकालमा सबै मन्टेश्वरी स्कुललाई संस्थामा आबद्द गराउने र स्कुलका संस्थापक प्रिन्सिपलहरुलाई आबश्यक पर्ने विभिन्न तालिम कार्यक्रम संचालन गर्ने लक्ष्य रहेको बताइन।
कार्यक्रममा एसोसिएसनकी सचिब रितादेवी सुबेदी, कार्यक्रम संयोजक संगीता अधिकारी, प्रशिक्षक मिलन केसी र लक्ष्मी शर्मा लगाएतले आआफ्नो भनाई राखेका थिए।
