पोखरा, सहकारीका बचतकर्ताको रकम हिनामिना गरेको आरोप लागेका बाग्लुङको ढोरपाटन नगरपालिकाका मेयर देवकुमार नेपाली एक वक्तव्यसहित फेसबुक भिडियोमार्फत् सार्वजनिक भएका छन् ।

उनी सहकारीमा रकम हिनामिना गरेको आरोप लागेपछि फरार भएका थिए । नेपालीले इमेज सहकारीका बचतकर्तालाई फिर्ता गर्नु पर्ने भन्दा धेरै सम्पत्ति आफ्नो परिवारसँग रहेको दावी पनि गरेका छन् । उनले बाहिर आएर काम गर्ने मौका दिए त्यो सम्पति बचतकर्तालाई हस्तान्तरण गर्न तयार रहेको बताए ।

मंगलबार सामाजिक सञ्जालमा लाइभ आएका मेयर नेपालीले जारी गरेको अपीलमा बाग्लुङ, पोखरा र काठमाण्डौमा गरी आफ्ना १८ वटा घर रहेको र ती घरको मूल्य ३ अर्ब भन्दा बढी रहेको दावी गरेका छन् । आफूले बचतकर्ताको पैसा फिर्ता गर्न तयार रहेको उनको भनाई छ ।

आफू ७ वर्षदेखि मेयरको जिम्मेबारीमा रहेको र सहकारीको कारोबार हेर्न नपाएको दावी गर्दै सहकारी समस्यामा परेको थाहा पाएर मिलाउने प्रयास गर्दा गर्दै सबै बचतकर्ता एकै चोटी रकम फिर्ता मागेर अप्ठेरोमा पारेको बताएका छन् । आफ्नो सम्पती बचतकर्तालाई हस्तान्तरण गर्नको लागी वातावरण मिलाई दिन मेयर नेपालीले आग्रह गरेका छन् ।

इमेज बचत तथा ऋण सहकारी संस्थाका अध्यक्षसमेत रहेका मेयर नेपाली बचतकर्ताको रकम तिर्न नसकेपछि गत जेठ ५ गतेदेखि फरार छन् ।