पोखरा, रात्रीकालिन व्यवसाय संचालनसँग सम्बद्ध कर्मचारी तथा संचालकलाई सुरक्षात्मक एवं कानुनी सचेतना प्रदान गरिएको छ ।

सामुदायिक सेवा एवं सामुदायिक प्रहरी सेवा जिल्ला समन्वय समिति कास्कीको आयोजना, जिल्ला प्रहरी कार्यालय कास्कीको सहकार्य तथा राइट फर चिल्ड्रन संस्थाको सहयोगमा यो कार्यक्रम सम्पन्न भएको हो ।

लेकसाइडमा आयोजित कार्यक्रममा सो ठाउँ स्थित रात्रिकालिन रूपमा सञ्चालित व्यवसायहरू (डान्स बार, क्लव, दोहोरी तथा होटल) आबद्ध महिला कर्मचारीहरूका साथै सञ्चालकहरूलाई कार्यस्थलमा हुन सक्ने महिला हिंसा, यौन दुरव्यवहार तथा अन्य महिला माथी हुन सक्ने विविध घटनाहरूको विषयमा सुरक्षात्मक एवं कानुनी सचेतनामूलक प्रशिक्षण प्रदान गरिएको हो ।

जिल्ला प्रहरी कार्यालय कास्कीका प्रमुख प्रहरी उपरीक्षक मोहन कुमार थापाको प्रमुख आतिथ्यता तथा पोखरा महानगरपालिका वडा नं.६ का वडा अध्यक्ष विष्णु बहादुर भट्टराई, पोखरा स्थित सामुदायिक सेवा केन्द्रका पदाधिकारीहरू, विभिन्न संघ संस्थाका प्रतिनिधि, होटल व्यवसायी तथा सञ्चालकहरू लगायत २१० जनाको उपस्थितिमा कार्यक्रम सम्पन्न भएको हो ।

कार्यक्रममा प्रहरी नायव उपरीक्षक श्रवण कुमार वि.क.ले सुरक्षात्मक एवं कानुनी सचेतना मूलक प्रशिक्षण प्रदान गरेको तथा प्रहरी निरीक्षक समिक्षा घिमिरे र अभिवक्ता कुन्जनी परियारले समेत अन्तरक्रिया गरेका थिए ।