पोखरा, मणिपाल घटनामा आफ्नो कमाण्ड सम्हाल्न नसकेको भन्दै प्रहरी अधिकृतको सरुवा भएको छ । मणिपाल अस्पताल डाक्टर कुटपिट प्रकरणमा कम्जोरी गरेको भन्दै वडा प्रहरी कार्यालय बैदामका प्रमुख डीएसपी वेदप्रकाश जोशीलाइ सरुवा गरिएको हो ।
जोशीको प्रहरी प्रधान कार्यालय अपराध अनुसन्धान विभागमा सरुवा भएको जनाइएको छ । अब बैदामको नेतृत्व डीएसपी राजेन्द्र श्रेष्ठले पाएका छन् ।
मणिपाल अस्पताल वडा प्रहरी कार्यालय बगरको कार्यक्षेत्र भित्र पर्ने भएपनि त्यसभन्दा माथिको पोष्टमा रहेका डिएसपी जोशीलाई थप मद्धतका लागि सुरक्षा नेतृत्वको जिम्मा प्रदान गरिएको थियो । प्रहरीले डाक्टरहरुलाई कुट्नू र इन्सपेक्टरले मनलाग्दी अश्लिल बोल्दै डाक्टर कुटेको बताउनू नै प्रहरीको कमजोरी रहेको प्रष्ट देखिन्छ ।
यस्तै, मृतकका आफन्त र चिकित्सकबीच तनावपूर्ण अवस्था भइरहेको बेलामा सुरक्षामा खटिएका बेला ‘डाक्टरलाई साप चुटेर आएँ’ भन्दै आक्रोसित भीडसामू अपशब्द बोल्ने प्रहरी निरीक्षक मदन श्रेष्ठले निलम्बनको सामना गर्नु परेको छ ।
सोमबार मणिपाल अस्पतालमा उपचाररत लमजुङकी ५७ वर्षीया सुकमाया दुराको निधन भएको थियो । त्यसपछि दुराका आफन्त र चिकित्सकबिच विवाद उत्पन्न भई डाक्टरमाथि कुटपिट भएको थियो । चिकित्सकहरु सेवा नै ठप्प पारी आन्दोलित छन् ।
मणिपालमा भर्ना भई उपचार गराइरहेका अरु बिरामीहरुको उपचार पनि प्रभावित भएको छ । मणिपाल प्रकरणमा अहिले पनि चिकित्सक र मृतकका आफन्तबीच तनाब विद्यमान नै छ ।
